新特首選舉臨近，個樣好似仲係風平浪靜，冇乜風滿樓嘅感覺，我等無知小民，識睇風水就奇啦，邊個風生水起，邊個一鋪清袋，唔到埋單嗰陣，林真翻生都未必算得中。話又講返轉頭，兵行險着，博懵博殺、博陰濕在所難免。年紀老邁，時常便秘，久坐廁所胡思亂想，諗吓諗吓又諗到條屎坑萌志十橋。
橋一、一心一意為全港市民服務，保好隻腳，保證五年內唔會腳痛。
橋二、將所有飛行記錄公開，證明自己同老婆都從來冇坐過1A機位。
橋三、唔識吹口哨。
橋四、申明冇人送過別墅俾我住，攞哂冰島、瑞士、夏威夷、杜拜、新西蘭、加拿大、澳洲的記錄出嚟，證明自己係赤條條嘅裸人，典型冇皮柴一條。
橋五、死口唔認嘢，永遠冇錯，一定係人哋錯。
橋六、提出已戒酒證明，所有藏酒已攞去拍賣，捐哂去慈善機構。
橋七、戒咗上艇習慣，亦警惕上嗰隻船沉嗰隻船，大大隻船一樣照沉嘅咒詛。
橋八、精通卸鑊之術，有鑊打死唔上身，隻隻由馬仔孭起。
橋九、已禁止老婆以我嘅姓氏做佢姓氏，同時禁止仔女响我任內話俾人知我係佢老竇，同時已將臉皮打厚十層，比牛皮更堅韌。
橋十、已經响戲院里擦鞋檔學滿師，擦術精明，吓吓向上擦，向下壓，非但唔會擦上膝頭，最多有時擦上褲襠。