28歲的唱作歌手力臻（Lagchun），另一身份是中學數學老師，但在幕前的形象，令外界質疑他身兼兩職會否出現予盾？更曾經因為在舞台上的衣著打扮，惹來校內同事批評，雖然力臻一直堅持兩個身份的平衡點，可是今年4月不被學校續約，為保生計，力臻將轉職為補習教師，堅持繼續追夢的原因，背後竟有一個感人故事。
力臻今年簽約Sony Music創立的新音樂廠牌「Green Music」，能夠被國際唱片公司留意，他坦言是一種肯定，「由我21年出道到依家，其實不停都係追求緊一個身份肯定，人哋會覺得你係一個老師、又做歌手，即係你做歌手係一個興趣，只係一個副業啦，其實唔係，我覺得兩樣嘢都好有意義，都全心全意咁做。」力臻簽約那天，去到亡父的墓前告訴他這個消息，「最想同爸爸慶祝，我相信佢聽到呢個消息一定會好開心。」
在香港中文大學就讀數學及數學教育雙主修學系的力臻，一直以來對唱歌有濃厚興趣，入行前參加過不少唱歌比賽和busking，正準備出道之時，父親卻突然離世，「當時已經籌備緊一隻album，爸爸日頭做貨車司機、晚上做鐵路維修，有一晚凌晨兩三點收到醫院電話，搭的士去醫院我一直拖住媽咪隻手，我已經feel到唔係太樂觀，去到醫院，個姑娘叫我媽咪坐低先，佢話爸爸送到醫院時已經過咗身，我記憶只係去到呢個moment，21歲大學未畢業，其實對我嚟講好大打擊，之後嘅記憶，就係喺醫院親戚搭住我膊頭話『大個仔喇，要照顧媽咪喇。』一夜之間變咗屋企一個好重要嘅支柱，我本身都知道歌手收入唔穩定，屋企本身環境亦好一般，爸爸離開咗之後，先知道屋企有一啲債務要處理，好幸運我大學畢業之後會有個教席，當時就先放低唱歌，畢業之後專心教書先。」
唱作歌手力臻另一身份是中學數學老師
後來力臻才知道，這些債務是父親為他供書教學而欠下的，「債務已經清晒，並唔係因為爸爸有咩不良嗜好，係因為俾我去補習、俾我去學琴考琴而簽落嘅卡數，都係我後來先知，佢咁辛苦打兩份工，七除八扣，每月都只係可以還到min pay。」力臻喜歡音樂，是因為受到父親的薰陶，「我每朝返學或者去補習，佢好多時都車我，喺車度成日都會播Beyond、哥哥張國榮，星期日佢喺屋企做家務，會播住一啲演唱會片，依家每次聽到Beyond嘅《冷雨夜》、《早班火車》都會諗起爸爸抹緊地畫面。」
成為了家庭經濟支注，原本已經放棄唱歌的念頭，但在收拾父親的遺物時，意外重燃力臻唱歌這團火，「喺電視機後面搵到隻USB，媽咪話係爸爸留低，一打開，入面全部都係我busking同埋歌唱比賽片，爸爸冇電腦亦都唔係好識用，原來叫表哥表姊幫佢下載，放喺佢架貨Van上面播，我好想為佢做返啲嘢。」
舞台上的形象，令外界質疑力臻身兼兩職會否出現予盾？
之後力臻選擇身兼兩職，一邊在中學教數學、一邊做唱作人，身兼曲、詞、編、監，可是這條路相當難行，「我諗呢兩個身份最大矛盾，係社會對老師嘅定型，我好多時同人講我係教書，啲人第一個反應都係『你咁樣點返學呀？』，呢個唔係一個惡意批評，但呢個係社會俾咗老師或者教育界一個規範，我相信呢一個係最大挑戰，又可能係大家普遍對做娛樂或者做音樂有一個小小偏見。」
今年4月，力臻不被學校續約，為保生計，力臻將由全職老師轉為兼職教師，「坦白講係一個收入來源啦，我都想令媽咪繼續放心，我覺得呢個係最緊要。」
在收拾父親的遺物時，意外重燃力臻唱歌這團火。
一個壞消息，一個好消息，失去教席的同時，力臻卻被國際唱片公司羅致，「對我嚟講係一個『第二人生』，唔係好似初出道好興奮咁出歌，依家出歌我覺得有個少少使命，想盡力做俾爸爸睇，因為呢個係佢俾我一個好大寄予。」最近推出新歌《我的課本留白處》，是力臻總結六年的教學生涯，「其實都有心理準備，但到真真正正知道要離開學校嗰個moment，會有一啲唔捨得，教咗六年，今年有一班中六校生要離開學校，等佢哋放榜嘅過程，我就寫好咗呢首歌，我都想送俾佢哋一份鼓勵和支持，其實我覺得呢首歌嘅出現，都證明緊呢兩個身份可以並存。」
新歌《我的課本留白處》，總結力臻6年教職生涯。
髮型︰Aki Choi
化妝︰Queenie Chan
場地︰Tapa Room
