尹光今日（29日）出席新城電台訪問，被問到方力申演唱會粉紅西裝造型抄襲他，他笑指大家都可能用同一個造型師，甚至羅志祥因為一個標題而決定急換演唱會海報棄粉紅色衫，「羅志祥件事我唔清楚，但之前好多人將我套衫搵出嚟，話方力申抄，我話唔係抄，只係我哋同一個服裝師，無話邊個抄邊個，事實我2月時真係著先，但之前有冇人著過我又唔知，唔通我又抄人咩，自己都撈咗幾廿年，咩都睇化了，讚唔好開心，彈就唔好傷心，咁就無事，我由七幾年代已俾人彈，話啲歌草根、咸濕，當時咪仲唔開心，而家可能同一首歌就話貼地，以前就衰到貼地，所以而家心態開心好重要，開心又一日，唔開心又一日，朋友話昨天係歷史，今天係禮物，明天係個謎，真係死咗都未定。」
至於5月19日在香港文化中心舉行的《尹光爆笑勁歌晒冷演唱會2026》，會否重現粉紅造型？「我演唱會好多衫，但全部衫未睇，因為今次只係小型演唱會，只有二千人，文化中心舉行，服裝唔緊要，著咩都得，唔同紅館咁大型，所以我老婆會搞惦，十幾年前我會自己揀衫，但老婆話我眼光唔好，我睇啱佢又話唔夠in，所以之後都交俾佢負責，今日都係佢幫我襯。」
更多圖輯：
