踏入二○二五年，一波新世代的來臨名為「Gen Beta」，這個世代是緊隨在「Gen Alpha」之後的一羣，從Gen X（約一九六五至一九七九年）開始，社會學家將每十五年歸為一個Generation。
時代巨輪，沒有人可以停留或改變逆行，但可以承傳下去，今年入行三十周年的楊千嬅，終於完成了多年的世界巡迴心願，總場數共五十三場，入場人次超過八十五萬人，千嬅亦重新認識了「楊千嬅」的歌曲，她說：「五十歲唱《少女的祈禱》先知，『從來未順利遇上好景降臨 如何能重拾信心』，『好景』未必係順風順水，原來可以係最差嘅時候，以前我覺得人生最差嘅時候，係一種毀滅，嘩，我碎到一地都係。」
這次巡唱最終站，千嬅打破了紀錄，成為首位於寶能廣州國際體育演藝中心，舉行七場演唱會的女歌手，單是這一站已吸引十二萬觀眾入場，整個世巡，她揀選全廣東歌歌單，讓觀眾見證「楊千嬅」的音樂歷程，由最早期的歌曲《狼來了》、《少女的祈禱》、《野孩子》、《可惜我是水瓶座》到近期的《好不容易遇見愛》與《還有事情可慶祝》，入場的除了Gen X、Y甚至有Gen Z（約一九九五至二O一O年)的出現，這一羣正是用短視頻看世界，數位原生的新世代。
是一個開始不是結果
本刊周日（12日）下午到達廣州，先到場館探望正在綵排的千嬅，主辦單位表示：「很多歌手舉行巡唱，因為唱了很多站，都不太會綵排，但千嬅每一站都會提前幾日到達當地，其實很難得。」看了歌單，記者私心看看有沒有心水歌，見到千嬅就講笑說︰「點解冇《深息》㗎？」她說：「唱過啦！」千嬅一向大情大性，但有些小細節，她都記在心中，結果這一場，她臨時要求導演Mark加插了《深息》做彩蛋。
演唱會以《飛女正傳》開場，千嬅從高空降下，舞台上的「生命之樹」由LED碎片組成，「一地碎片」讓千嬅成長和領悟。「以前我永遠係追住，嘩，好順喎，我再努力，但當你喺最逆境時候，你先知道原來我要面對嘅嘢！以前錫我嘅人，幫我做晒擋晒，當我一支公走出去，要面對所有困難，原來真係考功力，呢啲先至係考驗。經歷完之後，我發覺我個信心，原來要起點搵返，五十歲唱《少女的祈禱》先知，『從來未順利遇上好景降臨 如何能重拾信心』，『好景』未必係順風順水，原來可以係最差嘅時候！以前我覺得人生最差嘅時候，係一種毀滅，嘩，我碎到一地都係，（包括）所有音樂和心；今日我可以講，所有毀滅同埋碎到一地都係嘅嘢，其實係一個開始，唔係一個結果，原來要更加強大，必須由碎片同灰燼開始。」這些「碎片」，是導演看到樂迷把千嬅的舊唱片打碎而生的概念。人的歷練就像一棵樹木的生長，希望把廣東歌帶到不同的地方和城市，像樹木一樣延續下去。
今次巡唱，千嬅重新認識了一堆經典歌曲，「錄《少女的祈禱》，我廿一歲咋，今日再唱，已經係兩個層次嘅嘢！以前我係有對象去唱，唱俾一個人聽，我失戀呀，今日我再唱晒所有歌嘅時候，我發現應該要同自己connect，唱埋俾自己聽，個命題大咗；以前《野孩子》只是一個失戀對象，要控訴一段逝去感情，依家再唱，原來我哋因為生活或者各樣世界變化、時代變化，我同自己走失咗，我點樣搵返自己？嗰個『野孩子』都係自己，所以最大意義就係呢度。」
楊千嬅的廣東歌庫超過二百首，特別在華星唱片時期，「楊千嬅」的歌曲、形象，定下一個好基礎，「我好感謝『華星』年代，我喺最好嘅年代出道，遇到一班最好伯樂，好多好歌，然後我好感動不同城市的人接受粵語文化，佢哋用心去study，尤其去到重慶、成都、天津、北京、西安、寧波，都令我好驚喜嘅地方，原本以為要好小心去遷就歌單，但原來佢哋全部都識，《稀客》係整個巡迴一個highlight。」《稀客》這首sidetrack，是收錄於二OO三年發行的專輯《Make Up》內，事緣這首廣東歌，在重慶站掀起大型合唱，視頻一夜翻紅，相隔二十年迅速竄上各大音樂榜，變成今時今日的主打歌。
千嬅感觸地說︰「雖然音樂同我一齊成長，但人嘅生命始終有限期，不過，音樂可以無限，呢棵大樹，希望種出每一個喜歡我，或者歌迷又好，其他人都好，就種在自己心裏，當你攰，唔開心，咪挨喺樹底聽下囉，好快，click入去就聽到。」
作品紀錄我的生命
這幾年的千嬅，重新建立，「呢幾年我要重建自己人生，有段時間去咗上海暫住，個仔返學，我就去做好多唔同類型音樂節目，堅持唱好多廣東歌，我想搵返自己，同節目組講，其實我好多歌，你試下俾我share下，又正是疫情，唔可以出街嘛，咪睇電視上網，開始累積一班年輕人，我知道今年又有一個新的Generation了，我個仔Alpha、我係X，嘩！搞咗幾代喎，有時個仔會話『媽咪你唔明㗎喇！』我咪話，咁你解釋下點解我唔明先？佢話依家影相係有Y2K影法，哦！我都經歷過千禧年喎，大家攤出嚟切磋下囉！」問到Torres尾場會否到場？千嬅直言︰「會，不過佢係睇另一個K-Pop騷，順便睇一睇我咁囉！」
本周日（19日）便是世巡的最終一場，這幾場已經是倒數階段，做一場少一場，千嬅身邊的同事，亦開始問她如何面對這個tour的結束，因為怕她失落，千嬅說：「其實由昆明（第四十四場），我已經開始預習去面對呢個tour嘅結束，一來就驚自己唔知會講咩啦，忍唔住呀、太過激動呀，又好唔捨得，又驚好失落，好多各樣各樣，但出奇地，我放完個聖誕假，好平靜好冷靜，可能人大咗，會識得沉澱好多，我唔知點解，五十歲生日之後，個人突然間變咗用另一個層次去諗嘢，嗱，可能最尾一場係崩潰嘅，如果真係，都係因為好滿足好感恩件事，因為我終於做到喇！」
《MY TREE OF LIVE世界巡迴演唱會》廣州站圖輯︰
化妝︰Ling Chan Make Up
髮型︰Cooney Lai
