團綜《MIRROR ACE》今晚（30日）播出最後一集，節目組安排MIRROR成員一起打邊爐、一邊玩遊戲。席間有一個規則，大家只能以中文全名做稱呼，不能叫英文名，叫錯的話要罰飲一杯，姜濤多次叫錯，頻頻被罰，飲到面紅耳赤，直指飲到「上頭」。在某輪遊戲中，姜濤抽籤抽到一條問答題：「假如你遇到8年前的自己，請俾3個建議佢。」姜濤答：「唔好買樓、唔好考車牌、同埋買某隻股票！」邱士縉問買邊隻股票？姜濤問：「出得街㗎咩？」江𤒹生笑言：「你都醉啦。」呂爵安大叫：「姜濤飲杯！姜濤飲杯！」兄弟齊齊歡呼，姜濤坦言：「堅係上頭啊真係！」
另外，王智德抽籤抽到一條任務題：「揀一位成員公主抱佢」，陳卓賢馬上帶頭推薦Alton抱姜濤，兄弟齊齊吶喊助威「姜濤！姜濤！」，Alton認真思考：「我而家諗緊我聽日有冇嘢做，承唔承受到傷害先，公主抱姜濤，我應該真係唔得。」兄弟齊呼：「你得嘅！」楊樂文笑說：「你平時唔係咁㗎喎！」Alton最後接受挑戰，迫不及待的姜濤興奮大叫：「Let’s go！我嚟啦！」Alton最後成功抱起姜濤數秒，一邊喘氣：「我見到光啊。」指自己累到上咗天堂。
最後一集，MIRROR各成員分享感受，柳應廷說：「我成日都覺得我哋呢個團呢，係爭咁一啲一齊玩，一齊經歷工作以外嘅嘢，咁所以呢個節目係好好，俾我哋一個機會相處。」邱傲然分享：「同埋我覺得最珍貴嘅唔係鏡頭前面拍到嘅嘢，而係鏡頭後，我哋好難得可以齊人去經歷一啲時光，即係打機、嗌咖啡、食早餐嗰啲。」
更多圖輯：
