TVB台慶劇《璀璨之城》昨晚（27日）播出第十二集，講述官志琛（姜大衞飾）死後，孝君（吳卓羲飾）因代理母親丁麗明（江美儀飾）股權，成尚利鋒最大話事人。看似失勢的孝賢（張智霖飾），暗地進行部署，除以妹妹Celia（蔣家旻飾）偷情證據逼Celia出賣孝君，又偽造假影片設陷阱，令孝君以「侵害名譽權」被起訴……
除對付親弟妹，孝賢還接「殺母仇人」丁麗明（江美儀飾）出院，丁麗明為保護孝君，向孝賢下跪懺悔、兼向孝賢保證孝君會放棄尚利鋒回歸平淡，之後麗明帶孝君及Kate（張曦雯飾）離開澳門前往香港。根據昨晚劇集預告，今晚將揭出美儀姐只是表面讓路，實際是密謀反擊，在港追尋官志琛爸爸遺下的4,000億巨額秘密資金。
昨晚焦點的一幕，是張智霖與江美儀在醫院的兩分鐘「巔峰演技對峙」。面對Chilam殺到埋身，美儀姐先是笑住向上望，然後便全程望住地下，兼語氣平靜地句句有骨寸爆，Chilam一副挑機樣勢要辣㷫美儀姐，二人的「機心VS扮傻」張力十足。
最初丁麗明扮作認不出孝賢，叫他「借借」，孝賢表明要接她回家，更下跪趨前望著她，並邊奸笑邊以輕蔑眼神繼續開火：「你到底真黐定假傻？」丁麗明霸氣回應：「真同假你識分咩？」孝賢出絕招指孝君「瀨晒嘢」：「佢好快連主席都冇得做」。令一向視孝君為心肝命椗的丁麗明笑意消失，眼神開始露出殺氣，最終激動地揪著孝賢的衣領瘋狂拷問，先是輕聲的：「你對佢做過啲咩嚟？」，之後再咬牙切齒怒吼：「你對佢做過啲咩嚟呀！」
另外，還有一場對壘戲同樣精采，丁麗明剪了一頭俐落短髮、身穿白色套裝返回官家，當聽到孝君轉述孝賢的惡行時，竟出其不意地在眾人面前向孝賢下跪兼宣布「投降」：「孝賢，係我毒死你阿媽，唔關佢兩個事，我而家跪低同你認錯，你想要我哋一半身家冇問題，全部賣晒畀你！」孝君亦答應收手，孝賢便冷笑著扶起丁麗明：「你跪我，我點受得起。」
談到丁麗明一出場已勁搶戲，江美儀受訪時透露，為了呈現出場時的標誌性銀灰色短髮，當時連續兩、三個月，每星期都要漂一次頭髮：「所以去到後期啲頭髮頂唔順斷晒。」為了配合角色瘋瘋癲癲設定，美儀姐亦刻意淡妝上陣：「雀斑、眼袋全部由得佢。」談到要演比自己年輕八年的吳卓羲的媽媽，美儀姐坦言最初收到劇本時，確是感到愕然：「但我睇完劇本後，覺得呢個角色好有挑戰性，雖然有心理關口，但作為一個演員有呢啲機會好難得，我就覺得不如試吓。」
更多圖輯：
