現年38歲的王君馨（Grace）與圈外老公Daniel相識20年並結婚8年，Grace於2023年完成心願開個人演唱會後，暫停追夢與老公計劃造人，及至去年底於社交平台宣布造人成功，蛇年將初為人母。
Grace最近接受商台《星光背後》節目訪問，分享懷孕的心路歷程。她透露今年五月為預產期，可是目前仍未有任何準備，「預產期係五月，但我咩都未準備，我成日以為係兩個月前先要買定晒啲嘢，而家準備好似有啲太快，我想感受下BB鍾意啲咩。」Grace表示一眾好姊姊Amazing Esthers跟她分享不少懷孕心得，她說：「佢哋會分享生小朋友過程、產後保養心得，同埋生前啲情緒要點處理等等。」她覺得懷孕後變得情緒化，「我頭兩三個月變得好感性，我睇睇下飲食節目都會響度喊，又試過同老公食食下飯，唔知做咩突然喊，但自己又唔知咩事，覺得好大壓力同不安。」
Grace在去年10月推出第一支跳唱廣東歌時，已得知自己懷孕，那段期間一直到電台忙着宣傳，亦把這好消息隱瞞到底，「當時係已經知道，但因為未同紐約老公嘅屋企人講，我哋想等到11月尾感恩節，返去嗰邊親自同屋企人講呢個消息。」Grace更分享與老公回到紐約報喜時的經歷，「始終係Daniel父母第一個孫，一定要當面去分享呢個喜悅，同佢成家十幾個人一齊講，係好開心，我哋仲特登為老爺奶奶做咗兩件寫住『grandpa』同『grandma』的衛衣做禮物，佢哋一打開就知道，好驚喜！。」
Grace由2020年轉做獨立跳唱歌手，一直獲丈夫支持追夢，所以2023年完成心願舉行首次個唱後，決心報答老公開始計劃造人，「演唱會實現咗我一個好大夢想，就諗準備好去下一個階段，因為如果我要BB，就要做一個負責任嘅媽咪，當我ready，就應該放低一切去照顧BB。」對於只用了一年便懷孕成功，她說：「都算係順利，不過準備前去做身體檢查，發現身體入面有啲瘜肉會影響懷孕，所以之前做咗個小手術，手術之後都要休養，係估唔到懷孕試咗差唔多6個月就有咗啦，係好感恩。」
Grace又分享了發現有喜一刻的過程，「之前都有一直驗孕都會有失望的階段。直至有一日，係星期二去祈禱小組，有個姊妹為我祈禱，跟住佢就話：『見到你個肚有個好大嘅光，呢個BB以後會係個Leader，會Shine for God！』就係因為佢嘅祈禱，我就無啦啦想試下再驗，點知發現中咗，我當時係呆咗！」她向老公報喜前，更連續三天不停驗，確定自己有喜才為老公送上喜訊，「我test多咗三日，因為我想好肯定先講，過咗三四日，之後就拍片記錄老公知道嘅反應。」她記得老公當知道喜訊時驚喜又激動，「之後又呆咗咁望住驗孕棒。」Grace坦言老公喜歡小朋友，不諱言產後即時追多個，「我自己覺得生女會易湊啲，而我老公好想生仔，可以為屋企開枝散葉，我自己都好想湊成個好字！」Grace仍然熱愛幕前工作和熱愛音樂，所以產後仍會繼續出歌。
