王君馨及黃劍文今日出席《普世歡騰星光夜》音樂會記者會，產後復出的王君馨表示稍後帶囡囡回美國住一個月，「今年帶囡囡返紐約一個月，12月22號先返香港，離港前排好舞再返美國慢慢練。（修身成功？）懷孕時重咗40磅，現在仲有5磅要減，之前生完又有做紮肚，都見到有啲成效，近排有多少少氣力可以做Gym，相信好快修身成功，目前只係面部啲皮膚有少少鬆弛，相信做運動就可以回復返。」問到做媽媽心情，「BB日日都唔同，近排又生牙仔，長大得好快，有重量，見到佢健康成長好開心，依家好期待佢叫媽咪嘅一日，希望叫媽咪先，唔係叫爸爸先，我同老公有時候會玩，同BB講媽媽愛你多啲，爸爸愛你多啲去爭，但我相信佢會知道爸爸媽媽都係愛佢。」
黃劍文年尾繼續忙唱歌，「下星期飛新加坡做音樂騷，嚟緊都準備不同音樂活動，之後又幫TVB拍節目，下年開始排音樂劇，12月都要開始綵排，所以都要保重身體，會多飲蜂蜜糖水，食蜂蜜糖，但自己平時少飲水，都要注意下。」
他希望有機會拍電影，挑戰一下，「雖然之前拍過微電影同單元劇，音樂劇都試過，覺得演戲對於唱歌都幫助，希望將來有機會可以拍電影。」
