玄戰｜張致恆認感情混亂致眾叛親離　 獲陳定幫預言：下個運會好好多

張致恆（Steven）以神秘嘉賓身份參與前晚（7日）播出《玄戰》，他自稱2019年開始「頭頭碰著黑、衰到貼地」，獲黑先知婆婆與助攻的John作出超詳盡測算： 「佢2019年結婚，同呢個人（另一半）離離合合，不停嗌離婚，不停有溝通、恐懼、安全感、錢嘅原因（問題），每一年都會咁發生」、 「工作運見佢都好唔穩定，不停Freelance，失業、創業，創業又失敗財運好差。今年佢特別嘅，我見到佢有個求原諒嘅牌，喺度搵緊機會，希望大家原諒佢。」婆婆最後更出奇不意表示想直接開名估神秘嘉賓真正身份正是張致恆。

Steven在昨晚播出的一集出場，他對婆婆的靈力讚不絕口：「基本上全部嘢都中晒咁滯，我覺得講得幾中。」Steven之後還詳述了過去七年感情及事業上的種種問題，並坦承經常入不敷支：「一開始係感情問題好混亂，令到好多嘢都冇晒，尤其是事業同埋身邊嘅朋友都離開晒，嗰段時間都收埋咗自己一排」、「嘗試過好多唔同嘅工作……咁小朋友嘅開支真係好大啦，呢一份工唔夠、就搵第二份工，呢份工都係唔夠喎，又再搵第二份工。」

顧問主持陳定幫師傅則預言，Steven即將否極泰來：「你本身條命係唔差嘅，如果比喻你本身係名牌跑車，只係依家嘅路崎嶇少少，同埋司機可以再揸得好啲」、「你下個運會好好多。」