英皇娛樂昨晚（6日）舉行新春團拜晚宴，集團主席楊受成博士率領旗下藝人包括：泳兒（Vincy）、歐陽震華、女團VIVA、周家怡、溫碧霞（Irene）、陳國邦、楊天宇（Angus）、曾傲棐（Arvin）、艾妮（Elly）、洪助昇（Aiden）、黎展峯（Andy）、黃明德（Dark）、阮雅（Bonnie）、海兒（Hedy）、黎峻（Kenneth）及朱天（Justin）出席，加上霍汶希（Mani）坐鎮，星光熠熠。
英皇眾同門藝人難得相聚，大家都把握機會合照，去年由英皇電影開拍的《破•地獄》大收一億六千多萬，成香港史上最強電影，老闆楊博士眼光獨到，即場舉行抽獎環節，氣氛熱鬧。
去年簽約英皇娛樂的歐陽震華，首次參加公司的新春團拜，他說：「好開心，因為我好多年冇參與類似活動，以前喺TVB好似冇呢個環節，團拜就有，但一齊食飯就冇！」歐陽震華指最興奮的是入了新公司後，做了一些他從沒做過的事，「第一年入公司，舊年六月開始到依家過咗半年，我覺得呢半年好刺激，刺激嘅係我做咗啲以前咁多年都冇做過、或者冇人搵我做過、甚至係自己冇諗過我會做到嘅事。」歐陽震華口中所說的，是參與了內地歌唱節目《聲生不息》 ，「初初我都覺得好似唔係好關我事，呢個節目唱歌嘅，個個都係樂壇天花板，但公司話關我事，因為嗰一集係講港劇主題曲，所以好適合我呢個身份上去，因為我實在拍太多港劇啦！」他坦然當時十分緊張，「我怕失禮公司、失禮香港演員。一唱完，我問公司同事有冇走音？佢哋話冇，我唱歌冇乜嘢技巧，只係真心演繹一首歌俾觀眾聽！」至於蛇年願望，歐陽震華說：「希望大家都身體健康，日日都開開心心，最重要係冇疾病、冇戰爭！」
至於今次領軍，當起大師姊的Vincy則說：「我今年比較主動，即刻衝出去派利市，同埋我屬狗，今年行運！哈哈！」日前推出了新歌《無糖可樂》的Vincy，在團拜晚宴上全程用「無糖可樂」祝酒，趁機宣傳新歌，非常醒目。