韓國男團Super Junior成員東海日前在香港亞博舉行個人首次solo巡唱，尾場唱到《HELP》一曲時，突因腰痛跪低，經多番嘗試仍未能站立，狀甚痛苦，之後掩面躺在台上，兩分鐘後，忍痛站起來，用手撐着腰繼續演出。歌曲結束後，在工作人員攙扶下落台，後來東海坐在椅子上道歉，他表示大家都知道他有椎間盤突出的問題，痛到沒辦法站起來，還自責落淚及哽咽道歉。
東海在事發當晚，親筆書寫中文道歉信，在個人社交平台發布：
「大家好，我係東海。喺呢度，想先同大家講聲抱歉!今日係喺香港舉辦嘅我首個個人演唱會嘅第二日，我喺開場嘅時候應承過大家，一定會令大家玩得好開心、好幸福，但係我冇做到，真係非常過意唔去！
因為今次亦都係我用心準備嘅專輯同埋演唱會，所以原本想藉住呢個演唱會，好好報答大家一直以來俾我嘅愛，但因為我自己嘅身體狀況而表現得唔夠好，真係令我覺得非常抱歉！
就算大家同我講『唔緊要』，但我覺得自己整親，始終係因為自己冇好好照顧好身體而造成嘅。所以我自己都好難過、好心痛。等大家咁擔心，仲令到大家流眼淚，真係好對唔住。
大家要嚟到演唱會現場，路程一定唔容易，大家將咁珍貴嘅時間交俾我，我卻令大家失望，我真係好心痛。我返到韓國之後會即刻接受治療，亦會好好調理身體，下次一定會用最好嘅狀態再返嚟見大家。如果下次再見面，我應承大家，一定只會帶俾大家快樂同幸福。
再次同大家講聲對唔住，我愛你哋。」
更多圖輯：
圖片來源：東海@instagram
