江美儀、張振朗、吳業坤及曾展望（GM）今日（20日）為節目《試真D唷》進行宣傳，適逢江美儀正日55歲生日，大夥準備了蛋糕為她賀壽，壽星的生日願望是節目收視節節上升，去完亞洲再去其他大洲。坤哥笑指與GM激嬲江美儀的能力已經不相伯仲，他透露在拍攝過程中，食牛眼覺得最難受，他指太太比他更勁，回到日本會食生雞刺身，「好血腥，我都是盡量陪她，這個節目應該找她來拍。」
GM早前到台灣拍攝期間，美儀着他買一款手信孝敬Sophie家人，他大讚美儀眼光獨到：「美儀姐真係冇介紹錯！嗰種係未食過嘅手信！當時我諗住買一盒，之後美儀姐叫我買多盒，最後我送俾Sophie媽咪同師傅，嗰個手信真係好特別！我都從來未食過！」
GM被問到中學時有沒有拍拖，他直言：「老實講，如果答你無都係呃你！我中學有拍拖！當時女方都唔係睇我外貌，係睇我內涵！」至於是否受歡迎程度是否校草級別，他說：「哈哈！呢啲我方便講！嗰陣我去選學生會，都幾多人揀我！」
談到Sophie透露有意雪卵，GM說：「我啲friend都有問我呢個新聞，我有聽佢講過，佢有問我點睇，我又覺得冇壞處，只係幫自己買個保障，到自己想做呢件事嘅時候，就可以保證呢件事嘅質素，就好似買保險咁樣。」當被提議馬上生B，免得雪卵時，他說：「我哋有傾過呢類嘅話題，大家都覺得未係時候，好老實講養一個小朋友好大責任，要喺各方面都要穩定啲先，而家先啱啱拍拖一年。我明大家好關心我哋各樣嘅狀況，老實講，真係有少少壓力！雖然我當初係不顧後果上節目去追佢，但係當真係拍拖嘅時候多咗好多人討論，成件事就會難好多，希望大家畀少少空間我哋！」
GM對於雪卵一事，自言沒有太多醫學常識，一直以為像捐精般容易，但發現要食藥打針，過程完全不易，但如果真的要雪卵，他會陪Sophie去診所，「我諗呢個係佢一個諗法，但係未實際執行。放心！我會好好照顧佢！」他承認Sophie事業心很重，現階段大家都想在事業上拼搏。
提到早前Sophie表演中國舞，GM表現得沾沾自喜，透露自己是第一個欣賞，笑言像古時的皇帝看妃子跳舞一樣，「我第一次聽佢講嘅時候，諗住好似普通跳舞表演，但係睇完之後發現佢跳中國舞好有feel，可能佢有考級，佢一舉手一投足都好似睇古裝戲嗰啲畫面，係靚嘅！佢真係好畀心機練！」
