今年開了個好頭，淇嘉豪Kaho首plug新歌《閃光》包辦曲詞編，記錄了他如何與自我、外界目光搏鬥的歷程，當閃避成為習慣，怎樣重新發現自己的光，「其實有少少想講依家做歌手，或者藝人或者幕前嘅一些代價，種種代價，其實我絕對明白，但同時仲未完全適應到，惟有去改變自己心態，慢慢去接受，有少少好矛盾！坦白講，以前冇人識，就好想有人識你，如果街上有人認得我就威喇，但如果全街都認得你，你就想透明，所以係矛盾嘅！有冇咩特別經歷好唔開心？可能網民又好，現實生活又好，其實有一啲超越自己認為對私隱有條底線，生活上冇咁自在，少咗機會見朋友，少咗出街，對生活對世界感受少咗好多，呢啲都係頭先講嗰啲代價。」
最新一步，Kaho將與林家謙、陳健安舉行今年的第一場拉闊音樂會，演繹「叱咤903」Oscar的作品，他說：「細個睇拉闊睇得多，長大後自己竟然有機會參加，係一件好勁嘅事！家謙同安仔都係屬於比較文青藝術少少歌手，我絕對唔係一個文青，今次被編排入去，我都發現自己有藝術一面，哈哈！」
這幾年，Kaho唱了一大堆情歌，但他說感情都沒有著落，「係呀，因為好難呀，頭先都講，同朋友出去食飯都冇乜機會，點會有機會去所謂認識異性，冇乜特別諗，同埋呢幾年，趁住好似有少少運，不如盡力先啦！」
他與COLLAR成員Ivy So（蘇雅琳）的戀情傳出多時，因《黑玻璃》獲得《叱咤》十大，又被網民重提戀情，不少網民猜測當中一句歌詞「接吻接到無法公開」更加惹人幻想，問Kaho將來拍拖是否都不會公開？他說：「我諗都未必會主動去講呢樣嘢，兩個人嘅事，唔想變全世界嘅事！愛情感情應該係兩個人嘅事，有咩就係兩個人去解決，如果個個都知，咁分手係咪又要同大家去交代呢？我都明白呢個行業，可能大家都好關注，依家呢個年紀都……唉，亦冇成家立室打算住，而且，我都應該唔會有下一代，我自己係囉，依家呢個世界，因為social media實在太美好啦，好容易導致到有好多比較，可能有人會覺得C朗帶個老婆搭私人飛機，點解我冇呀？好難唔去比較，係囉，我自己就冇呢個打算，同埋見到阿媽對住我同細佬都咁辛苦，細個屋企窮呀，依家可能有啲能力生活好啲，我自己都未享受過，唔諗住啦！」
封面攝影：Andy Chan
攝影協力︰小白、Melody Ng
花絮攝影︰洪志富
形象︰Nana Wong
形象協力︰Haley Chau
化妝︰Circle Chong
髮型：Haysses Ip@PRIVATE I SALON
服飾︰Alexander McQueen、Chaumet、Damiani、Diesel、Gentle Monster、Giuseppe Zanotti、Isabel Marant、Kenzo、Longchamp、Mei Wo Leng