「THREE IN LOVE 草蜢演唱會2026」昨晚在紅館舉行第六場演出，現場星光熠熠，圈中友人陳奕迅與太太徐濠縈、鄺美雲、馮允謙、黃淑蔓、車沅沅和劉浩龍等紛紛捧場，而表演嘉賓更請來歌神張學友。學友出場與草蜢合唱《暫停，開始過》，全場觀眾揮動手燈一同大合唱。蔡一智表示，學友當年曾擔任草蜢25周年演唱會的表演嘉賓，如今40周年再度擔任嘉賓，別具意義。阿智說：「自從我哋師傅（梅艷芳）走咗，我哋視學友為長輩，有咩都會去問佢。」學友聽後笑言：「我本來唔戴眼鏡上台嘅，但草蜢好似食咗防腐劑，出場前台下啲人叫我最好戴返副眼鏡，遮吓啲皺紋、眼袋，睇起上嚟夾啲！」此話一出全場笑聲不斷。
阿智指學友一直有個「迷思」，就是到底他與草蜢誰才是前輩。阿智解釋：「學友成日話我哋出道先，我反對，因為我哋參加完新秀之後，我參加19區歌唱比賽唱學友嘅《造夢者》。」說罷他與學友即興合唱了幾句。蘇志威補充，草蜢參加1985年新秀歌唱大賽，同年跟隨梅姐踏上紅館表演；學友則自爆1983年曾參加新秀但未能入圍，翌年參加歌唱比賽並於1985年出唱片，所以這個「迷思」終於解開——四捨五入之下，學友算是草蜢的「前輩」。
提起「前輩」一詞，學友話鋒一轉，大讚草蜢的經理人林珊珊。他說：「講起林珊珊，佢真係好勁！我上網睇到佢唱《再見Puppy Love》，我突然變得後生咗，好耐冇試過回春嘅感覺，佢係我覺得最正嘅嘉賓。」蔡一傑即回應：「你都好正，每次見到你都好似見到家人！」學友認真地大讚傑仔：「你好勁！」全場隨即報以熱烈掌聲。學友有感而發地說：「草蜢無論大騷細騷、有騷冇騷，都一齊40年！我自己一個人唱40年，唔使理人，好易，但你哋三個一齊40年真係好難，唔係講笑，我衷心佩服！」
阿智隨後表示有禮物送給學友，學友笑說：「我等咗好耐，上網睇到嘉賓有禮物！」原來是一支寫上「學友兄，你是我們唯一傳奇。智、威、傑上」的錦旗。學友笑言不可以掛在睡房，阿智即說：「你掛住一個人就得啦！」學友幽默回應：「要入紙申請㗎！」全場爆笑。傑仔特別點唱學友的《你是我今生唯一傳奇》並一同合唱，阿智得戚地對觀眾說：「你哋買飛睇學友要第一行，我哋可以咁貼，係咪好妒忌呢？」
昨晚草蜢完騷後，阿智、傑仔、經理人林珊珊和演唱會監製家萍等團隊，在紅館後台為5月3日生日、正式「登六」的蘇志威倒數慶祝生日。踏入零時零分，眾人齊聲大合唱生日歌，場面非常熱鬧。蘇志威的太太劉小慧與兩個囡囡Yumi和Ina上前擁抱。蘇志威興奮地揚言：「聽日尾場，我會落足200%力表演，慶祝我60大壽！」
