Sammi曾經地獄式減肥，雖然練到一身肌肉，但冇脂肪太骨感，曾經錯誤減肥的Sammi，近年極度自律保持身型，她認為自律並非一味的壓抑，而是為了換取更有質量的放縱，「自律嘅背後，就必須要有時放縱先得。都要俾自己有啲 Cheat day，食吓啲零食、食吓Cheat meal，等自己開心下。你有一定嘅放鬆，你就有咁樣嘅動力，同埋先可以持久到做咁長嘅自律。」在飲食管理上，她分享了目前採用的「高中低碳飲食法」，會根據當天的運動量調整碳水攝取。而面對演唱會等高消耗工作，她也有自己的能量秘訣：「我以前會食叉燒飯，而家我就傾向食麥皮。我就食好多麥皮，喺麥皮當中攞能量，因為你淨係食蛋白質冇碳水呢，你個 Energy 好快消晒。」至於Cheat meal，她自揭：「我會食零食同鍾意食炸嘢，其實乜炸物我都得！」
說到今年連續兩次黑仔事件；一，是在日本拍攝新歌《隕石與地球》MV，全條片「冇影」；二，演唱會臨開騷前因故延期，最後安排原定日子做答謝會。Sammi展現了成熟的危機處理智慧，她認為在危機發生的當下，最重要的是「同理心」：「一個人對一件事嗰個期待值係相當之珍貴。我第一時間就係諗觀眾佢需要啲乜，我點樣去理解佢哋個心情呢？尤其係一啲飛返嚟香港睇騷嘅歌迷。」Sammi 回憶道，當時她第一時間先安撫團隊：「我同公司講：你唔好擔心我心情，I’m fine。你要處理你要處理嘅嘢。我哋點樣行下一步？先處理好自己嘅心情好緊要，你唔好將自己額外嘅心情令到公司覺得好驚。」
這種「先利他」的思維，讓她在答謝會上找回了音樂的溫度。她特別提到那件「七年戰袍」的感人插曲：「係開騷前一日醒起呢件衫好適合啟德呢個場，設計師Tomas再喺倉攞返件衫出嚟，我嗰日再睇Tomas 喺後台戴住老花眼鏡一針一線再修補呢件衫，我好感動。其實我 Rehearsal 著呢件袍嘅時候，我成隻眼都係淚水。我覺得佢冇將個心血扔咗，有陣時有啲嘢，你覺得當刻做咗好似白費咗，但係原來冇㗎，個生命就會安頓。」
至於拍攝新歌《隕石與地球》MV 遇上的波折，原來團隊曾建議用 AI 補救，但被她果斷拒絕。「同事提出試下用 AI 整一個片出嚟，我當下就拒絕咗。我覺得呢首歌唔係好想用 AI 呢個設置，我希望用真實嘅情感去演繹呢隻歌。」最終，她決定利用助手在現場用手機側拍的畫面進行修復，雖然畫質未必完美，但保留了最珍貴的真實感。
經歷接連打擊，Sammi有沒有認為自己行衰運？「我好少將自己嘅際遇同『黑仔』聯想，我覺得人生總會發生一啲唔如意，呢個係人生嘅必然。我嘅學習係：情緒唔好擺到咁前，而係諗方法去處理。我會第一時間 Jump into 對方個立場諗：佢需要啲乜？佢 Suffer 緊啲乜？喺呢件事我可唔可以補救到啲乜？呢個就係學習危機處理一個好重要嘅嘢。」
