陳家樂和連詩雅（Shiga）結婚兩年，由兩口子變成三口幸福之家，Shiga產後工作忙個不停，除了唱歌、主持還踏足舞台劇界，老婆過足戲癮，家樂亦不讓老婆專美，踩過界為網上平台主持新節目《巴打圍爐》，與火火、梁釗峰和KB拍住上。
《巴打圍爐》第一集早前在YouTube上架，主題為「男人自尊底線！窮和性無能都不及XX？」，火火竟毫不留情對家樂說：「我哋三個都比較憎你，因為你係人生勝利組，男主角、靚仔、老婆靚、家庭又幸福！」被狂笠高帽的家樂表示：「我諗勝利係你哋誤會咗我。可能係既定印象，都未真係了解我就話我勝利。」
火火認為家樂靚仔有利追女仔，家樂則耍手擰頭：「普通靚仔，有好多好靚仔嘅，唔係我話想要邊個（女仔）就可以要邊個嘅！」火火追問他有否追女仔的失敗經驗，家樂則表現尷尬，笑說：「我又好少有媾唔到女嘅經驗。」眾人馬上起哄，他即時解釋因為要有十足把握才會出手，火火再逼問：「咁係咪百發百中？」此時家樂已經無計可施，唯有焗認：「好似真係少啲。」
家樂在節目中大讚老婆Shiga對他非常遷就，夫妻倆甚少吵架，談到人生低潮期時，家樂竟表示現時活在辛苦中：「可能好多人覺得我好多嘢做，我能力未必可以俾我選擇做或唔做，又唔知自己嘅選擇啱唔啱，譬如今年我放低咗一啲工作，但收入就減少，冇咗呢啲錢，點照顧屋企呢？！」而家樂最希望演技獲認同，有其他突破。
