張家輝、薛家燕與吳若希今日（6日）出席《新城廣播乙巳年新春團拜》，一身紅金新年裝束的家燕姐，被問到是否好耐沒有見張家輝？她說：「睇電影成日見，真人好耐冇見，以前成日喺電視城見佢走來走去，好欣賞佢電影上貢獻，得到影帝真係實至名歸！頭先都聽聞佢準備出新歌，我可以喺旁邊就跳十字步，我平時網上睇佢晚宴有唱歌，把聲好靚，當然要唱多啲好歌，嚟緊樂壇又多個新人。」
家燕姐更大讚身邊的吳若希，「我同吳若希合作過，佢好勤力又好乖，頭先拜年第一句話身體健康，好啱聽！（孫仔點同你拜年？）佢初一知我攞利市出嚟，就即話拜年喇、拜年喇！仲同我用日文拜年，我都唔識講日文，不過新年，我哋全家一齊去日本旅行，真係好開心，我哋早上5點起身去富士山，影相出嚟好靚，雖然旅行好勞累，但好值得可以一家人去旅行，希望年尾都可以再計劃去旅行。」
吳若希則表示今年準備出歌，「因為上年好忙，暫時放兩個月假抖下先，之後再衝刺，今年會出新歌，都想邀請家輝哥合唱，佢好風趣，可以同呢啲有趣及有經驗前輩係好值得，大家又可以講吓婚後生活！佢頭先都同我講，叫我唔好成日鬧老公，其實我好愛我老公，我會銘記於心！（同佢開咗年未？）我同佢開咗年，1月30日佢生日，開咗年喇，就快40歲，成熟啲啦！」
更多現場圖輯：
