《中年好聲音4 決戰美加澳》昨晚（11月30日）播映，再誕生多3名5燈選手，分別為莫煥基《霧之戀》、鄭家聲《他不愛我》及袁帥《想你的夜》，當中本身坐擁15年聲樂導師經驗的袁帥，憑藉超強唱功、勁靚假音、真假聲轉換的悅耳及順暢度贏盡好評，短短半首歌已橫掃五燈佳績。
谷亞溦：「一邊聽，一邊好興奮！你真係好好，你有做到enjoy呢個舞台，當我哋俾晒燈你嘅時候，你更加有自信，你仲俾多咗好多嘢出嚟添！我希望你唔好驕傲。」周國豐：「確實係今集表現得最好嘅一位參賽者，恭喜你先！你好適合去唱R&B或者唱Jazz嘅歌，因為你嘅音樂感好好，我好鍾意聽你啲ad-lib。溦溦老師話你去到後半部分係有啲玩嘢嘅，但係咪咁易玩到？又確實唔容易嘅，佢仲係玩得好添喎！」
張佳添：「係爽嘅！成晚10首歌，呢首係最難唱嘅一隻，原本我冇乜期望、唔好『炒粉』已經好好。點知成晚三個5燈，你係最5燈嗰個5燈。」肥媽：「好難得有一位參賽者係愈聽愈有嘅！唔怪之得啦，原來學聲樂！」袁帥2012年曾參加過無綫全球華人新秀歌唱大賽，當時成功打入全球前五名；另據車婉婉透露，袁帥原來為了參加《中4》、成功減掉75公斤，令溦溦驚訝至下巴也險些掉在地上。
至於另一名5燈選手莫煥基獻唱《霧之戀》，不但樣子青靚白淨，唱功亦相當不俗，但美中不足而又搞笑的是，當5位評審撳完燈後，莫煥基竟來個「臨尾走音」，令評審們忍不住為他大感好彩。肥媽：「你走（音）早一句都冇5盞燈啊！你有自己（風格）不特止，把聲係靚嘅。」海兒：「你嘅聲音好有辨識度、幾有張力嘅。」
