男歌手吳浩康最近密密開live同四圍busking，真係勾起唔少人當年聽〈洗剪吹〉同〈先入為主〉嘅集體回憶。大家等咗咁耐，Deep早前終於宣布今年十二月會喺九展開騷，而演唱會門票於今早九點網上優先開賣，開賣不足一小時已火速售罄。
對於演唱會門票的好銷情，Deep表示意想不到：「冇諗過係咪真（一個鐘內賣晒），因為同我講嗰個同事我比較信任佢，所以佢一同我講，我真係好開心、好激動，好多謝身邊同事、朋友、家人嘅support。」「其實一路都好緊張個狀況，噚晚一路瞓唔着，到半夜四點都未瞓得着。今朝一起身都留意住個狀況，見到咁多人支持自己，更加要做好啲，唔好令大家失望。」而Deep更直言希望可以加場，但要留待公司再作決定。
〈較早前錄影〉MV起用新人Angus，夥拍網絡紅人曾樂彤做對手戲。
另一方面，八年冇出新歌的Deep，新歌MV〈較早前錄影〉亦於今日發布。新歌由黃偉文（Wyman）填詞，Deep表示要特別感謝Wyman，因為〈較早前錄影〉的歌詞「從自棄到自重」寫出了他的心聲，「其實面對被標籤嘅狀況都冇得理太多，索性做好自己先，專注去實踐自己嘅目標。」咁佢嘅目標又係乜？「不到紅館心不死，開騷係我好想做嘅一件事！」
Angus與網絡紅人曾樂彤參與〈較早前錄影〉mv拍攝
