現年61歲的「亞視一哥」陳啟泰，當年憑主持經典遊戲節目《百萬富翁》掀起全城熱話，更因此奠定其亞視鎮台地位。近年主力在內地發展的他鮮有在港露面，去年更被發現驚現老態，身形暴漲兼面容浮腫，與昔日官仔骨骨的形象大相逕庭，引發外界關注。直至近日，陳啟泰接受資深傳媒人汪曼玲的YouTube頻道節目《快拍。曼鏡頭》訪問，才激罕剖悉這段「失蹤」真相，原來他在疫情期間因全面停工，引發家族遺傳的嚴重抑鬱症，更曾絕望得身處20樓住所萌生「如果世界末日，拖住老婆一齊走都幾幸福」的消極念頭，陷入人生最黑暗的低谷。
陳啟泰在訪問中透露，自己過去十多年主要的工作都在內地，但疫情期間無法往返內地開工，加上香港影視圈當時幾乎全面停擺，令他只能長期賦閒在家，「咁就造就咗我嘅人生低點。」他坦言家族有抑鬱症遺傳史，母親和兄弟都曾受嚴重抑鬱困擾，「我媽媽後生失眠、抑鬱都好嚴重。我本身都有抑鬱，失眠咗好多年。」原本已受失眠煎熬多年的他，本打算完成手頭工作後便嘗試戒掉安眠藥，豈料疫情突然來襲，令他進退失據，「點知戒唔到，我知道係有啲嘢，最慘COVID又啱啱開始，驚出咗去睇醫生，中咗招要去隔離，如果我去咗隔離，你畀一罐安眠藥都冇用，因為我都瞓唔到，一定發癲，一定癲晒。」
因為諱疾忌醫，陳啟泰的病情在最初半年急劇惡化，「個人情緒低落啦、抑鬱啦、驚恐啦，有一日直情打畀我老婆，話我唔得喇，撐唔住，好辛苦，要佢即刻返屋企。」幸得太太即時放下所有工作，全天候24小時在旁陪伴守護，「呢個真係一個好難忘嘅經驗，嗰陣佢都好痛苦，因為唔可以出門，只可以朝早去買餸，之後喺屋企陪我，連去沖涼都唔可以太耐，只要有佢喺身邊，我就會覺得舒服，覺得有安全感，比較平靜啲，因為我人壞咗，其實應該係個腦細胞壞。」他憶述母親當年病發時亦有同樣情况，必須有人陪伴在側，否則便會情緒低落甚至失控，他曾以為自己夠健康不會步其後塵，結果還是逃不過這個家族魔咒。
隨着病情加劇，陳啟泰終於鼓起勇氣求醫，「我覺得唔得喇，就算中咗COVID都要去睇精神科醫生，睇咗開始慢慢有轉機，精神病好返好多。」然而，服藥帶來的副作用亦令他飽受折磨，「呢個係我人生最最最痛苦嘅階段，我由170幾磅，跌到150多磅，後嚟食咗醫生啲藥，去到210幾磅，但呢啲係無止境，越食越冇效。」他透露直至一年前仍未成功戒藥，「一路食緊精神科醫生嘅藥，每晚食六、七粒，朝早食兩、三粒，一定要食咗先瞓到，唔會驚慌。」即使其後轉換醫生，甚至嘗試用益生菌的另類療法，均未見成效。
在最嚴重的時期，陳啟泰坦言腦海曾閃過輕生的念頭，「嗰陣我住20樓，成日經常望出去，『嘩！』咁樣走返嚟，但係冇衝動，我冇諗跳樓，只係突然間如果係世界末日，我拖住老婆一齊走都幾幸福。」他更提到早幾年的一次地震經歷，「嗰晚都係瞓唔到，覺得係個天畀我嘅預兆，係最接近死亡，我好唔捨得我太太，始終佢好後生，好彩慢慢好番，起碼我捱過咗呢一次，我識得點樣面對，而家睇返係一個學習過程。」
經歷漫長的求醫之路，陳啟泰最終透過排毒療程迎來轉機，「喺大半年前開始戒咗好多藥，只需要食保健品已經可以瞓到，叫做拎返個健康，不過仲有4成可以進步，如果大家係過來人，千祈唔好驚，回復健康嘅道路係好困難。」他去年被指容貌衰老走樣，如今看來亦與藥物引致的體重波動有關。陳啟泰又提到，除了亞視的作品外，外界對他最深刻的還有曾分享飲尿治病的心得，他引述《本草綱目》指飲尿是正統中醫療法，更稱此舉曾幫助姑姐的風濕病十多年沒有發作，不過他未有回應本人有否嘗試過該療法。走出人生低谷的陳啟泰，以自身經歷勉勵同路人，勇敢面對漫長的康復之路。