《全民造星VI》冠軍王偉俊（TELLER）前日（13日）在記者會上率先首唱新歌《I’m Telling You》。歌曲由Teddy Fan作曲編曲、TELLER親自填詞、李一丁監製，以嶄新曲風呈現「單戀這件小事」，玩味十足。錄音過程中，監製一丁為激發TELLER靈感，更與他挑戰限時改寫歌詞，相當有趣。
TELLER透露，今次是首次在一首歌中填寫大量中文歌詞：「之前作品多數係英文，為咗做足準備，我專誠去書店翻字典，希望填詞過程更順利。」歌詞中重複三次「One More Time」，他解釋：「除咗表達對愛情嘅看法，同時想展現自己嘅人生態度——『One More Time』即係再來一次，因為我哋永遠唔可能100%準備好，所以一定要把握機會，『見好就做』，呢個亦係我嘅人生座右銘！」
新歌MV於情人節晚上上架，成為TELLER送給粉絲「TELLER星人」的甜蜜禮物。MV中他飾演便利店收銀員，對女神一見鍾情，因單戀而產生無數幻想，連其他顧客都變成女神模樣，演繹出「怎麼我眼內人人是你」的搞笑畫面。
TELLER笑言：「店員TELLER沉醉喺幻想世界，以為同女神有進一步發展，最後先發現一切係幻象。成個MV以幻想為主軸，好多場口都好好笑，拍攝過程好開心。」他更分享最難忘一幕：「最難忘是逃離眾多女神的場口，我要在地面上匍匐前行，恍如打仗一樣，一邊爬行一邊拿起地上的檸檬，當手榴彈一樣擲向『她們』，十分好玩！」
從《造星VI》總決賽至今個多月，TELLER坦言最大挑戰仍是面對鏡頭：「我仲未適應有咁多鏡頭拍攝自己，但每次出席活動同受訪都獲益良多，希望大家俾啲時間我調適，情況一定會好轉。」
雖然仍有「鏡頭恐懼」，但TELLER對音樂之路信心十足：「希望之後嘅作品可以形成一系列故事，例如甜蜜、分手同復合嘅歌曲。同時想做類似Eminem《Not Afraid》嘅作品，透過音樂給予歌迷力量，面對生活中唔同挫折同難關，呢個係我嘅終極目標！」
