又到聖誕，還有兩個多星期就到普天同慶的日子，家人在美國的劉穎鏇講到聖誕節，就一臉雀躍，直言歸心似箭：「我主要個目標係希望聖誕可以返到去 LA（洛杉磯）嗰邊陪屋企人過囉。但我係未買機票嘅，因為始終做嘢為主，希望一有空檔時間就可以即刻走。」劉穎鏇工作排得密麻麻，剛為商場的聖誕活動拍攝宣傳打卡照，又為《飛常日誌II》趕埋尾，她說之後有機會開拍新綜藝節目，不過也抽空在商場買聖誕禮物。
講到聖誕送禮，Tiffany 笑指自己好幸運，因為屋企人無互送禮物嘅習慣，幫佢慳返唔少：「我試過想送禮物俾父母，但佢地樣樣都話唔想要。（收過最 Sweet 嘅禮物係乜？）Fans送嘅手作最Sweet，佢哋會集齊我好多相整成相簿，呢啲要花時間做嘅嘢最有意義。（有冇追求者送過？）又好似冇。（送手作會加分？）會嘅。」她透露每年聖誕都好渴望能與家人渡過，全家人食飯、傾偈嘅感覺特別Warm。
劉穎鏇笑言家人作風好洋化、好 Chill，在飯桌前唔會被「逼供」終身大事，「又冇喎！佢哋反而成日問我喺香港做緊乜，拍緊咩劇或者綜藝節目，想了解我嘅工作多啲！」雖然Tiffany近日人氣急升，但佢自爆其實係一名「宅女」，平時好少主動出街，最鍾意留喺屋企：「同朋友出街食飯都會嘅，如果被 Fans 認出，都會大方影相同簽名都 OK 嘅，不過如果太素顏可能就會戴返個口罩遮遮，廢事嚇親人！」
