英皇娛樂集團營運總裁、英皇（北京）文化發展有限公司CEO霍汶希（Mani），近日接受周國豐的YouTube節目《國豐百科》訪問，這位捧紅無數巨星的金牌經理人，大爆由如何「湊大」反叛的謝霆鋒，到陪伴容祖兒度過失聲低潮，更透露英皇藝人個個都忠心，原來全因老闆楊受成的一個特質！
Mani於節目中分享她的「成功藝人條件」，「最重要係要有好大上進心，要贏要成功！」第二要主動，「公司鋪路搭橋俾你，但你自己積唔積極去俾人看見？」最後才是勤力，不過Mani現實地說：「依家咩人都勤力啦，唔勤力根本做唔到呢行！」一語道破娛樂圈生存法則。
說到英皇藝人忠心，Mani即大讚老闆楊受成是精神領袖，「老闆話唔係靠抽藝人佣金搵錢，而係靠藝人衍生project賺錢！」她更大爆業內秘密，「娛樂圈好現實，你一沉就百踩，一出事就劃清界線，但我親眼見證，就算藝人插水，老闆都不離不棄，諗方法幫佢解決。」
提到自己入行已經32年，其實原來Mani最初是想當藝人，不過被無綫及華星拒諸門外，後來誤打誤撞入了飛圖做經理人，第一個負責的藝人便是趙學而。Mani回憶當年陪趙學而去日本拍旅遊特輯，一日行十多個鐘，結果《每隔兩秒》賣到白金唱片，簽名會過千人，令她終於被認同和肯定經理人的身份。
至於「湊」15歲時的謝霆鋒，Mani可謂一把辛酸淚。她說，試過帶霆鋒去商台做訪問，轉頭不見人，原來他用「壁虎功」爬上天花板；有次去配音又失蹤，竟然走了出去玩曱甴，認真失控！二人亦試過於電話鬧交，Mani差啲震穿耳膜，「佢好大聲，真係痛呀隻耳仔！」不過霆鋒都有暖心一面，有次Mani失戀七日沒吃飯，霆鋒竟然上門安慰，贈了一句：「珠，仔死仔還在！」還送禮物，令到Mani即刻醒晒！
說到怎樣發掘容祖兒，Mani指直覺告訴她這個女生一定紅！最讓她難忘的是，祖兒聲帶生繭陷入低潮，Mani說：「我希望喺佢屋企陪佢瞓，同佢傾偈陪佢。當一個人覺得把聲係唯一資本，連呢樣都冇埋，嗰種絕望係明嘅！」幸好最後祖兒靠針灸及治療恢復靚聲，成就今日天后地位。
Mani至今效力英皇32年，跟她一手湊大的藝人一樣，都感受到公司的不離不棄。除此之外，她又爆老闆自動波加人工，「我真係冇要求過，係老闆自己加俾我！」
