去年40歲生日宣布改名傅寶誼的傅穎（Theresa），相隔九年終於昨日（26日）返香港跟粉絲見面，一開便連開兩場，全場爆滿。
Theresa坦言今次本來沒有計劃搞FM，只是回港工作，不過在朋友慫恿下「扚起心肝」，而且更有意外驚喜：「諗住得十零廿個fans嚟啦，點知大家咁熱情，最後要分上下兩場。」今次除了香港fans，更有三位新加坡及兩位馬來西亞粉絲專登搭飛機來撐場，而且是即日來回，更有跟隨她多年的粉絲帶同三歲囡囡來參加聚會。
見面會一開始，Theresa便跟每位粉絲合照，之後回答網上收集粉絲的問題，由近況到未來工作計劃、Cookie會否合體，到心態分享、人生觀、愛情觀等，Theresa都一一詳細解答。Theresa談到近況自爆說：「本人比你哋最初認識我嘅時候重咗10kg！」台下粉絲即刻嗌「真係睇唔出」，氹得Theresa笑逐顏開。
隨後Theresa分享人生哲理：「該遊戲嘅時候遊戲，該工作嘅時候工作。」她指香港人終日一股腦去衝，但其實生活有很多種方法，「每個人時間表都唔一樣，唔需要隨波逐流，要有自己嘅節奏。」至於愛情觀，Theresa更加玄妙：「所有感情都係緣起緣滅，緣聚緣散。對於身邊嘅人唔需要太過執著，分分合合係世間常態。」
至於Cookies合體問題，Theresa保持開放態度：「呢個世界係冇絕對，我唔可以話一定會或者一定唔會，凡事有兩面。」至於點樣面對網上負評，佢就話：「最緊要自己個心唔動，其實係冇人可以傷害到我哋。」
Theresa又謂做直播之後令自己改變了不少：「大家可能發現我比較talkative咗，其實我以前唔係好講嘢。」又笑言習慣了沒有人給反應的時候自己都可以說很多話，「其實有少少解放天性，因為以前唔係好想表達自己，或者我唔識表達自己，依家多咗方式去表達自己，係成長嘅一部份。」她又指直播令自己更加貼地，現在更加懂得站在別人立場去想。
