苑瓊丹
苑瓊丹於在佛山的新直播公司開幕，邀請一眾圈中好友陳百祥（阿叻）、陳浩民、鄭則士、黃一山、林子聰、羅天池、金剛、黃子揚、李焯寧、張頴康、張美妮等出席外，苑仔同時宣布與「視帝」陳山聰簽約，齊齊直播拍住上！
陳山聰、苑瓊丹
山聰笑言苑仔一直鍾意「靚仔」，更「睇住」自己成長，所以很安心合作：「其實我覺得最重要係大家互相信任、誠意，大家都覺得有合作嘅空間和同一陣線，呢個係最重要！我喺內地經驗唔及苑仔，佢係我嘅盲公竹，就好似細個嗰陣，都係佢話我知我要點樣做戲，TVB年代已經係咁樣，今日又繞咗一圈再次合作！」山聰笑言未知直播收入，但兒子開始升小學，要苑仔幫補補習費。
鄭則士、林燕明
苑仔表示今次投資過千萬，對陳山聰非常有信心：「佢基本上係我第一個簽約藝人，無論護膚、滋補、時裝，甚至做運動，佢各方面好適合做直播，好有說服力！第二件事就係佢知道我唔係古靈精怪，起碼佢同我一齊合作，唔會有人跣佢！我哋合作好簡單，就係做好呢件事，做唔好又唔會俾人留難。」
阿叻當日出席力撐好友外，還爆新出爐視后佘詩曼昔日往事：「當年係我提攜佢出嚟，你哋知唔知？我喺意大利識佢阿媽，得我一個知邊個係佢老竇，所以佢當年選香港小姐時，佢媽媽打俾我話個女選香港小姐，咁我話包佢頭三名，我諗住亂噏，點知佢真係第三！」
提到好友曾志偉宣布辭任TVB高層一事，阿叻為對方送上祝福：「替佢開心，功成身退！我覺得佢做得很好，依家冇人可以坐嗰個位咁耐，因為你好難將一個已經低沉嘅事業，慢慢拉上嚟，不過好辛苦嘅！我都覺得佢好辛苦，但依家功成身退，佢自己覺得開心就好，做咩都係自己覺得開心就好，唔使理人哋講啲乜，好似我咁樣口沒遮攔都唔會死。」
