林子祥與葉蒨文於紅館舉行的演唱會，昨晚（12日）是第4場，適逢林子祥78歲生日，瞬間變成生日派對。每晚唱完《零時十分》後，例牌有生日環節，而昨晚的壽星公是台上的阿Lam！當Sally問觀眾今晚有邊個生日時，「我好似識一個人生日⋯⋯係你！」隨即爆出故仔，「我嗰陣第一次唱《零時十分》，問佢乜嘢意思，佢話：『林振強咁寫嘅，我唔知喎。』跟住佢唱《十分十二吋》，我又問乜嘢意思，佢又話唔知！你講啦！」阿Lam即謂：「總之我而家個車牌都係1012！」
Sally繼續大爆阿Lam昨日上午的搞笑對話：「我同佢講Happy birthday，佢竟然問『我今年幾多歲？係咪77？』我話No！It was last year！」阿Lam尷尬叫停：「唔使講咁多啦！」但Sally堅持要講：「你有冇試過生日有咁多人同你唱生日歌？」隨即帶領全場大合唱。接着大屏幕播出重量級祝賀片，包括許冠傑、洪金寶、劉德華、郭富城、楊千嬅、炎明熹、李克勤、容祖兒、林丹、賈樟柯等。驚喜陸續有來，Sally話：「仲有你識嘅人！」兒子林德信同太太即刻抱住孫女林明上台，孫女仲錫錫爺爺。Sally哽咽透露更大驚喜：「個女April啱啱喺美國飛返嚟！」原來阿Lam完全被蒙在鼓裏，相擁時令壽星不禁流淚。
演唱會尾段，前來睇騷的陳奕迅驚喜現身台上，三人合唱《數字人生》，由於歌曲節奏愈唱愈快，唱完後，Eason五體投地、甘拜下風問二人：「你哋點做到？」完騷後，阿Lam與Sally返到後台，大會再送上幾個蛋糕，為壽星慶生，這個12點前的驚喜，阿Lam照單全收，多謝大家的祝福。
更多圖輯：
