林敏驄與一眾《觸電》演員大玩VR遊戲。
電影《觸電》一陣演員林敏驄、陳穎欣（Yanny）、盧慧敏（Amy Lo）、陳毅燊（ANSONBEAN）、蘇皓兒（Chloe）近日頻頻為新戲宣傳及四出到各大戲院謝票，日前導演梁國輝、林敏驄、陳穎欣、ANSONBEAN、李玗蓁及梁雋彥等，到長沙灣與《觸電》觀眾一齊體驗虛擬實境射擊遊戲，大玩VR遊戲，眾人玩得非常投入，林敏驄笑言：「非常好玩，我都隊冧咗5、6件。我係第一次玩VR game。」當被Yanny問及遊戲一開始時有沒有頭暈，林敏驄則搞笑回應「有頭痕」。Yanny說：「遊戲剛開始時我枝槍射唔出，好嬲，如果唔係贏嘅一定係我。不過覺得真係好逼真，高位唔敢行。」
一身戲中造型的ANSONBEAN說：「我冇試過玩得咁開心，出咁多汗，係咁跌槍。」ANSONBEAN被林敏驄指大汗得似沖涼，ANSONBEAN說：「我都唔知點解，原來著羽絨真係好熱。」林敏驄嘲笑說：「都懵懵哋，著件羽絨出嚟。」李玗蓁說：「我被人隊冧咗好多次，但係好好玩，好投入。」
於剛過去的周六及周日，《觸電》一眾台前幕後四出參與謝票活動，大家齊心力撐。而早前宣布患癌的柯煒林（Will）也現身大力支持，他表示：「戲入面所有電競遊戲，我都係拍呢部戲先開始學，戲中追求真實性，所以請了電競選手教我哋，唔使做嘢嘅時候就打機。」飾演柯煒林電競世界化身的ANSONBEAN，以一身戲中角色造型及手持道具手槍謝票，誠意十足，而他亦非常入戲，分享時用槍指向觀眾大搞氣氛，Chloe見狀即笑住叫柯煒林按下「靜音掣」叫停他，非常搞笑。
ANSONBEAN笑說：「我哋拍之前練咗一段時間，多謝銘師傅（羅浩銘）教導，拍嘅過程非常好玩、熱血、開心。」蘇皓兒說：「我拍攝前一、兩個月先開始學功夫，對我嚟講幾難，但睇到成品咁靚係值得。」在戲中擔任教練的吳肇軒笑指：「喺戲中係管理唔到驄哥，佢那句對白話我『瘦到似賣棺材』，都係埋到位先知，劇本冇。」
