Kiri T推出新歌《藍剔未必是壞習慣》，由她親自作曲、陳廣杰填詞、Daniel Toh編曲及監製。
「藍剔」代表着拒絕或落空，可是Kiri卻認為「藍剔」不完全代表悲傷和負面，而是代表「你看過我的說話」、「我們不太近，也不太遠」的一種微妙又浪漫的存在。新歌《藍剔未必是壞習慣》將這種「不清不楚」重新詮釋，在已讀不回的狀態中，找到一點的療癒空間。
Kiri說：「呢首歌嘅靈感，其實係源於我覺得喺我成長時期嘅時候，會有好多歌曲講暗戀，但近年就好少關於暗戀、曖昧嘅歌，一係就熱戀、一係就失戀，我就諗不如我出一首暗戀歌曲啦！然後發現暗戀嗰種『唔清唔楚』其實同被『藍剔』嘅感覺好似，哈哈！有時候我自己同埋身邊嘅朋友，都會覺得喺通訊軟件入面睇到對方一直顯示『輸入中』，就會好心急想知道對方想同我講啲乜嘢/覆我乜嘢？或者當你發現你被『藍剔』咗嘅時候，你會瘋狂喺度諗，點解明明睇咗我message但係唔覆我，係咪逃避我？然後每隔一陣，又開返個對話出嚟睇吓佢覆咗你未？呢個好糾結嘅情緒，就好似暗戀同埋曖昧咁！」
她續說：「但係我又覺得如果處於一個暗戀狀態下，有時候『唔清唔楚』又未必係一件壞事喎！因為呢一個狀態下，我唔需要擔心被拒絕，我可以幻想有好多種美好結局！」
Kiri T於去年舉行的個人演唱會大獲好評，近日更飛出香港，於澳洲墨爾本及悉尼舉行首個海外演唱會，一直未有機會到澳洲旅遊的Kiri，事前感到超級期待，她說：「我一直都未有機會去澳洲旅遊，所以第一次去澳洲，就係去開我嘅個人演唱會，真係好開心！再加上喺社交平台都知道好多澳洲fans，都好期待我可以過去開演唱會，所以今次可以喺悉尼同墨爾本開show，我覺得好開心，可以將我嘅音樂，親身帶到去澳洲現場唱俾大家聽！最難忘嘅係，我估唔到去到澳洲，大家都可以一齊大合唱，唔係淨係副歌，係由verse開始就已經一齊大合唱，我真係好感動！同埋好開心可以邀請到澳洲歌手Ivoris成為我暖場同表演嘉賓，因為當初同事同我提議搵呢位歌手嘅時候，我發現原來我個playlist入面，有好多好多都係佢嘅歌曲，可以喺澳洲親身同佢見面，再同佢一齊合唱，嗰個感覺實在太好了！」
