阿姐表示拍完《帶阿姐看世界》外景後，經常掛住嘉洛仔及阿Nic，故今日見到二人十分開心。受訪期間三人互笠高帽，阿姐感激他們在行程中對自己照顧有加，而出名口花花的嘉洛仔則回敬：「阿姐先係照顧我哋嗰個呀！」嘉洛仔又笑謂，自從與阿姐看過世界後，為人變得更有內涵：「大家知我出名冇內涵，但認識咗阿姐之後，就明白到原來有涵養嘅人係咁樣，所以我之後都有睇多啲書。」阿Nic則大讚阿姐專業又捱得：「因為我哋喺摩洛哥拍攝時，撞正歐洲熱浪，最熱有44度。我記得阿姐完咗個Trip，落機第二日仲可以完成一個大型Live Show，真係好犀利。」阿姐聞言接着說：「係呀，我最記得我哋喺沙漠執啲沙摸上手係滾嘅，可以煮熟蛋咁滯。」
談到生日願望，阿姐簡單表示「身體健康」，問到家英哥有何表示，阿姐幽默謂：「佢好大表示呀，今晚我哋嗰餐飯係佢安排㗎！」並透露每年生日習俗，是吃家裏姐姐準備的長壽麵及自家製蛋糕仔 ！
更多圖輯：
