汪明荃、黃宗澤、蔡少芬、朱茵、姜大衞、譚俊彥、朱栢康、蔡潔等，今日（17日）出席新劇《風華背後》開鏡拜神。
張晉早前自爆曾突然心臟病發緊張送院，蔡少芬被問到老公的身體情況時，表示感謝大家關心，又重提他當時病發情況，「當時我哋喺新加坡玩時，佢突然呼吸唔到，郁唔到又唞不到氣，講唔到嘢要坐埋一邊休息，當時我哋排緊鴨仔船，都擔心佢，佢就叫我哋先去玩，所以自己都幾衰，放低老公唔知咩事。」她起初以為跟感冒有關，但看到氣色不好，「我知道大鑊啦，我一直為佢祈禱，隔一陣佢話冇事，到第二日早上傾偈，他含住淚話：『當時望住我哋三個，如果自己瞓低咗，可能見唔到你哋，我一定唔可以畀自己瞓低，一定要企翻起身，結果我企起身啦，覺得好感恩。』佢一邊講我一邊喊，我未見過佢咁樣。」她又透露張晉之前試過兩次類似情況，「喺三月時已發生過，所以我都問過醫生，亦幫佢做咗心電圖測試，心電圖好靚仔冇事。」今次回港後，張晉再接受檢查，經電腦斷層掃描才發現有血管堵塞近80%，要即時做支架，蔡少芬說：「我知道時甚至跪地喊，我依家先知一剎那便可以永別，我當時抱住他、感謝神，好彩佢冇事，如果佢有事我一定會癲！」蔡少芬坦言事後更珍惜彼此，要求張晉為健康戒油戒辣，改善好多習慣，「要感恩啦，差少少做咗寡婦！佢差啲客死異鄉。」至於張晉現時已回到內地工作，有指他太早復工，蔡少芬表示已問過醫生，「通波仔」後便沒有事，需要多做帶氧運動，保持健康，她亦會與老公一起努力運動維持健康。
汪明荃今個月28日便迎來78歲生日，席間獲劇組送上生日蛋糕提前慶祝，阿姐多謝劇組有心思，提到再拍劇是因為高層樂易玲很有誠意，而且能伙拍姜大衞、黃宗澤，感覺特別，再者也很想跟譚俊彥合作，所以被打動了。她又透露生日願望是拍攝順利、大家平安及健康，「相信開工唔會太辛苦，我嘅戲分較少外景，只係為戲入面兩個女蔡少芬、朱茵爭鬥有啲激動。」
阿姐透露生日要開工，飛日本補拍旅遊節目，但今次不會跟老公羅家英同行，因為已跟他相約11月同遊不丹，又笑言不要講家英哥，應多講網劇。談到家英哥在網上受訪時自爆幾乎花光積蓄治癌，而且注射女性賀爾蒙致性慾全失等，事後稱惹網民曲解意思，被阿姐鬧亂說話，阿姐為此笑言：「佢講太多啦！佢近幾日對我好好！聽到我拍劇，佢話好。」
她被問到有沒有禁止家英哥再做專訪時，表示：「家英哥好錫傳媒朋友，知道大家想收料，大家氹氹佢就會講！我哋一把年紀，講呢啲話題都好正常，我唔會因為網民講嘅說話而嬲，以前就容易嬲，依家好啲啦！（怕唔怕佢爆私房事？）又唔會，傻㗎咩！」
黃宗澤今次跟阿姐對手戲不多，但能與兩位重量級前輩阿姐和姜大衞再碰頭，已非常感動，亦難忘初出道拍《我的野蠻奶奶》和《我師傅係黃飛鴻》獲兩人照顧，他表示開工定了一些任務，除照顧兩位前輩收工時間，也希望煲湯給阿姐飲作回饋，「我以前都飲阿姐唔少湯水。」
