前「東張女神」林泳淘（Wingto）近日出行都有阻滯，連環發生不幸事件。Wingto今日（22日）在Instagram自爆早前駕車經城門隧道時，發現座駕爆胎，過程十分驚險！
她寫道：「一入到隧道口已經聽到架車有怪聲，到中段啲聲愈來愈大聲（好似就嚟要解體咁）而且已經有啲比油都行唔到嘅感覺，所以我就一路打住死火燈一路行，後面架車都非常機警立刻慢駛兼同我保持一段距離。」
Wingto想起最近見到私家車著火，司機及時跳車新聞，「我即刻望向車頭同車尾，心裏面一路自我安慰，矛（冇）事嘅，當初揀車林生就係相中佢拎咗超多安全認證先買嘅！（唔係廣告）唔會爆嘅唔會爆嘅！！好驚但係喺隧道又唔敢貿貿然停車睇咩事，好翻騰咁行到尾段。」
Wingto指旁經的司機都紛紛建議她停車：「結果一停車，就見到我條軚已經消失咗（Where are you going thai?）然後隧道公司超專業，極速就嚟到，極速就處理好問題，（佢哋真係好好人，十萬個讚）然後我架車個邊，又好快咁幫我拖車返廠做埋檢查，最終無阻到人，架車咁爆軚又無失控，仲有咁多人提醒同幫忙，內心真係無限感恩！！」
她又表示最近十分黑仔：「今個月兩架車，一架壞波箱要拎去劏，一架爆軚兼發現之前俾人hit&run有內傷，仲要換晒4條軚（到期所以一次過），然後林生電話又突然壞咗，兼最後back up係201X年…真係一波未完一波又起，但係發生咁多事最終人無事，已經係最大嘅幸運！最後…希望今年快啲過，同埋…電話真係要定期Backup。」
圖片來源：林泳淘@Instagram
