Advertisement

尋人記II|93歲胡婆婆騷流利英語 以「不枉此生」形容傳奇一生

本地
2022.06.10
1.5k
撰文:Rita
昨晚播的一集主角胡婆婆,經歷傳奇一生,網民大讚感動。
昨晚播的一集主角胡婆婆,經歷傳奇一生,網民大讚感動。

無綫昨晚播出的第七集《尋人記II》,主角是93歲的胡月華婆婆,她和一班因戰亂失散的陶秀中學女生,1990年接受《星期一檔案》訪問,暢談戰後重逢奇遇。攝製隊於網上一份2009年「恩愛夫婦」嘉許名單上尋得胡婆婆,多年後再受訪,她劈頭第一句:「估唔到我仲捱到三十年,哈哈。」穿過悲喜,跨過生死,「我依然係我」的胡婆婆笑聲依舊、健談如昔,雖然視力只剩約一成,結婚七十載的丈夫及一眾同學亦已相繼離世,婆婆依然笑看人生:「個個死晒咁滯喇。(有冇唔開心呀?)冇!人生係咁㗎嘛…我希望你爸爸早啲接我走,佢唔嫌我煩,佢係我最佳聽眾。」

讀書愛出貓、做訪問都要食住漢堡包的胡婆婆,膽大心細面皮厚,主持方東昇問她再上鏡會否緊張?她一臉得意謂:「我使乜緊張呀,咩場面未見過?」想當年戰亂打斷婆婆的升學之路,但她求知欲強,主動向爸爸的外籍同事請教,最後憑一口流利英語,獲酒店聘為兼職保母,專門替遊客照顧孩子。婆婆更應攝製隊要求即席「露兩手」,流利如昔的英語震撼不少網民:「婆婆英語唔錯喎」、「佢啲英文好過我啲廣東話」、「識用Hire的士真心勁」。

胡婆婆講英文Lak Lak聲,網民好多都話真係甘拜下風。
胡婆婆講英文Lak Lak聲,網民好多都話真係甘拜下風。

這位「星級保母」更分享獨門收服「扭計王」妙法,當小朋友拒絕進食,神回一句:「I Don’t Care!」,如果孩子表示不喜歡她,馬上還以顏色:「Me Too!」鐵腕對待小主人的胡婆婆,在僱主面前心細如塵兼有分寸,連享用免費午餐都有獨門哲理:「公司埋單我咪叫靚嘢,佢(客人自己)埋單我咪叫個Burger(漢堡包)算數。」成為搶手「保母王」的胡婆,曾獲已故荷里活影星史提夫麥昆一家寫信表揚,難怪於90年代時薪曾高達300港元。

胡婆婆作風「快狠準」,堪稱一代烈女,原來還有溫情一面。兒子勁剛大讚媽媽是好太太:「本來我媽條腰冇咁彎,就係嗰時照顧我阿爸,成日要扶佢。入到老人院,老實講有邊個太太真係日日走去陪佢五六個鐘,我阿爸係世上最幸福嘅人。」在旁的胡婆婆仍然自責:「我依然覺得照顧得佢唔好,連累佢入老人院。」走過悲歡離合的胡婆婆,最後以「不枉此生」形容其傳奇一生,簡簡單單四個字感動無數網民:「感動,婆婆93歲仲咁精靈,子女孝順,真係不枉此生」。
與婆婆一樣心細如塵的攝製隊,最後為視力只剩約一成的婆婆送上一部舊式小型錄音機,將婆婆以往的受訪片段收進錄音帶內,方便婆婆日後隨時隨地重聽昔日人和情。

攝製隊為胡婆婆送上貼心又窩心的小禮物。
攝製隊為胡婆婆送上貼心又窩心的小禮物。
MIRROR 陳卓賢 姜濤
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹