Advertisement

最憎退稅(上集)

其他文章
2016.06.04
695

TAX FREE奇觀

「有種你就唔好俾,俾得咁刻薄咁麻煩,衰過唔俾,邊有人請人食飯成碟叉雞飯倒落地下先叫人食嘅唧!」每次我在巴黎、米蘭、倫敦和一切話自己禮待遊客所以把銷售稅refund的國家,排隊排足三粒鐘但感覺自己送上門俾人奚落時,我都忍唔住口噏噏以上對白!

全世界都知道我是最喜歡遊行最深愛shopping的一個人,過程之中任何突發意外棘手事件我都可以阿Q精神地扭轉成一種「樂趣」,豐富日後回憶的質感……唯獨退稅這個環節,一直卡住,唔得!仲係好憎!

你問我全世界邊個城市退稅最衰?

基本上歐洲各大購物城市各有各衰,是的,比起十年前,係好咗好多了,例如法國機場的退稅表格,近年已由肉眼檢查人手蓋印改成電腦負責「嘟嘟」,效率快了不特止,最正是不用捱海關人員的情緒面色(除非你張單好大)。英國機場也由「蓋印」與「攞cash」兩條長龍整合成一條,窗口也大量增加,但整體來說,退稅好多時還是好受氣的!

主要問題在那些負責發放現金的銀行或兌款公司,是的,退入信用卡戶口最方便但冇尾飛陀率仍然不少,最放心當然是拿着cash走人,但那些幫你將退稅form變回現金的公司手法仍然無良,通常是只給退回當地貨幣的一個窗口,而且那個窗口的員工手腳特別慢。如果你肯拿其他貨幣,那些窗口又多又快手,因為這樣他們除了可以如常「食你一截」退稅的handling charge之外,還可以多賺一筆相當心狠手辣的外幣兌換差額,你本來能收回的100元,此時已得返70。

你同佢鬥長命排足兩粒鐘那條「本地貨幣」的長龍其實也不見得下場幸福好多,通常千辛萬苦輪到你,那個teller都會臭串地告訴你,你要拿的現金太多了而他們無咁多現錢(吓,打開門做得foreign exchange嘅生意會『無咁多現錢』?),而只給你一部分的當地貨幣,然後賴皮地迫你餘下的收「外幣」,總之是㩒住嚟搶!那些縱容這種公司的國家其實在其他方面再改善也仍然功不抵過吧!

其實呢,我覺得早在商店俾錢時那個填報稅表,印報稅表的手續還可以更簡化一點,比如開個中央的退稅者資料戶口然後存入提出稅款都在這裏進行……不過這一筆我都未得閒同你計了!

最長的龍和最短的龍

那麼你又會問全世界最長的退稅和最短的退稅龍在哪裏?

最長的我目測是米蘭,因為他們會叫你拿着行李先去航空公司check-in拿登機證(排一次隊),keep起要退稅的物品等海關檢查然後剩下的先寄艙→然後你要帶着那些退稅品和表格去海關蓋印(排第二次隊)→檢查完蓋好印你又要回到另一個窗口進行退稅品Bag Drop(排第三次隊)→進了海關後又得排銀行那條拿cash的隊(排第四次隊!),是的,因為每次都要乘四,所以加起來的長龍冠軍就是他了!

至於最短的,我經歷過的是冰島的雷克雅未克,不但不用排,事實上退稅窗口長年落下金屬捲閘,你有需要才撳鐘仔等關員出來開窗,但這樣方便恐怕你亦無福消受,因為……

冰島有嘢你買咩?

(未完待續)

莫文蔚 聲夢傳奇 星級企業大獎2020
人氣 TRENDING
張家朗 何詩蓓 姜濤 MIRROR ERROR 東京奧運 香港小姐 聲夢傳奇 炎明熹