新疆界

董培新.唔三唔四半世紀
2016.10.01
647

近來成日聽啲數字,聽到頭都痕埋:乜嘢萬七,乜嘢四千,又話不如三千七。個個面紅耳綠,連乜辦物辦,最後都只係怎辦?其實件事容易辦,阿爺講一句就萬事好辦。界者界線也,由界線劃分疆界,即係話疆土同界線係分唔開嘅。有界線冇疆土,俾條線俾你有鬼用咩?一句愛心無疆界仲冇用,就係得個心。所以,有疆先至有界,疆亦在阿爺手上,無人可以分割。阿爺從來唔承認任何不平等條約,唔理你時可以唔理你,想理你時你又吟詩都吟唔甩。今日世道,鍾意講河蟹,最緊要氣氛河蟹,好過食大閘蟹。在下扭六壬扭咗幾十年,忽然扭到條屎橋,唔知管唔管用。

前邊講萬七,講極都唔埋欄,講穿都係一個字,錢咁簡單啫,錢又可以以物相換,實搞得掂格,你話用疆嚟換界得唔得呀?着數可以俾足你,一畝地換一百畝地,制唔制?唔制仲可以加碼!即係話,你哋攞一畝新界棕土地出嚟,就俾返一百畝新疆棕土地俾你,正地嚟㗎,嗰度係一帶一路嘅起點,地近高鐵沿線,不久之將來經濟必定極速起飛,話唔埋三年八載,變出幾十個杜拜出嚟,嗰陣就唔係廿畝田廿畝地咁寒酸啦。而且凡係棕土、礫土、石炭土種葡提子,釀紅酒第一流。以我哋原住民過往征服倫敦,征服荷蘭嘅經驗,新疆嗰啲回回好易搞掂,又可巨發,又可為國立功,光宗耀祖。使乜糾纏於萬七咁窄嘅空間?又唔開心,又俾人誤會咁冤屈呀。唔得,今晚要食多啲大頭菜,等瞓着發返個好夢,打個電話上去獻條好橋。

黃心穎 許志安 鄭秀文
人氣 TRENDING
鄭秀文 許志安 黃心穎 蔡一智 馬國明
https://www.mpweekly.com/icons/bka256x256.ico