從hip-hop組合，變身多棲食腦怪傑，農夫繼續熱得燙手，身兼聲演及創作粵語對白的《小企鵝大長征2》即將公映，再與鄭裕玲（嘟姐）、黃翠如合作的《Do姐再Shopping》亦備受期待，十一月假麥花臣場館舉行演唱會，首個創作的電影劇本更可望出爐……
「都係好彩啫！」陸永與C君不斷謙言事業只屬「細哎嘢」（小兒科），反而近日有項「成就」，才令他倆足以自豪──「今次再合作，發覺嘟姐竟然有點『農夫化』！」
首部《小企鵝大長征》摘取奧斯卡最佳紀錄片，續集再度深入南極捕捉企鵝新面貌，找來農夫聲演及創作粵語對白，Ｃ君說：「原本法文旁白有中文翻譯本，寫得好正經，我們盡量在那個框框裏發掘趣味，又不可以玩得太癲，要經過審查才能出街。」近一個月來絞盡腦汁，悉力平衡趣味與資訊，陸永笑道：「我們經常犯一個錯誤，就是說那班『人』怎樣怎樣，但這齣戲哪有任何『人』呢？全都是企鵝！」小試牛刀，恍如是一次上佳熱身，Ｃ君承認，農夫編寫的首個劇本，行將面世。「一直都想寫電影劇本，當興趣度吓橋、寫吓分場，叫做有幾粒子彈，有機會見到投資者，便隨他們選擇；暫時不能透露拍板哪個的詳情，很快便會揭盅。」
類似軟硬（林海峰與葛民輝）的背景與發迹，陸永與Ｃ君由同學變成拍檔，憑食腦發展成多棲藝人，時而單飛、時而合體，陸永形容：「彼此關係就如屋企人，好熟落、好親密，但平時盡量少見，太悶了，你放假會不會約老竇出來吹水？約細佬去玩？約朋友吧！就算他做自己工作，我也不會抱怨：『為什麼不預我？』大家都沒有所謂。」眾所周知，軟硬曾一度疏離，甚至不相往還，近年才再走在一起，Ｃ君分析：「通常有類似情況，都是得到很多利益，一個job起碼立即買到樓，我哋咁『細哎』，有咩風波可言？就算俾晒啲片酬你，又幾多呢？人哋可能俾晒佢，可以養埋佢個孫，咁先至有拗撬㗎嘛！你講緊軟硬喎！」陸永補上：「到有日真的不和、不見面，你再來恭喜我們吧！」
早前，陸永與Ｃ君分別被偷拍搬新屋，有指他們「發咗達」，Ｃ君嘆口氣：「不過是租屋，有幾勁？都沒想過買！」農夫頻頻耕作，貌似撈到風生水起，居然儲不到錢買樓？「唉，要使唔晒先有得儲，個個月都掹掹緊，點儲啫？我都有屋企人（要養）㗎！」仍屬單身的Ｃ君尚且「無殼」，已有兩女（一穎與一心）的陸永負擔更重，暫時也無添丁打算：「除非好像阿Bob（林盛斌）有九個工人，那就舒服好多！湊小朋友好恐慌，反而教育好容易，小朋友從來不會給大人壓力，只有大人給壓力小朋友，她們只學了少少技能如游水，我沒要求去學什麼來面試，一切視乎你想她們報讀哪間學校，有些學校說明不用知道小朋友學過或參加過些什麼。」
即使如何呻窮，無可否認近年農夫人氣持續高企，尤以跟鄭裕玲合作最有火花，繼《Do姐去Shopping》及《Do姐有問題》後欲罷不能，再來《Do姐再Shopping》，陸永直言：「今次再合作，跟嘟姐友情更進一步，對她保持九分尊敬、一分叛逆，就看看那『一分』幾時爆發出來！」早前在日本拍外景，嘟姐上載一條教執行李的短片，「兩隻嘢」不時挑戰「專家」的無上權威，看來叛逆已超越「一分」！Ｃ君忍不住笑：「她不是影執行李，而是『教』執行李，有幾霹靂啫？大家都係咁執㗎啦！」嘟姐甘於被嘲，主動上載片段，也顯然是幽默感的表現，他們雀躍兼自豪地形容，嘟姐已有「農夫化」的趨勢！Ｃ君大條道理：「無端端會講爛gag，以為佢係阮兆祥扮咁！嘟姐進化到2.0，我們好開心！」點爛法？陸永直道：「爛到記唔到！」
為免「後患」，是時候頌揚嘟姐的溫情一面，Ｃ君首先發言：「在你面前讚你只是客套，嘟姐經常在我們背後，包括前輩與客戶面前讚，還不算帶挈我們？」陸永緊接：「她從不當我們是後輩，當然不代表可以不尊重她，她真的一視同仁，我們早已過了守時這一關，現在嘟姐的難題是，不能被我們早她太多，兩點通告，我們一般點半已到。」
■ 撰文：翟浩然／攝影：張保祿／
髮型：Renton Hung@VIA IL COLPO／化妝：Manyee Lau