唱了二十六年歌，這次踏上舞台，對楊千嬅很不容易。
鍚她的人都有反對她在這個時候開騷，直至要落實場館前，千嬅跟大家講：「我ready㗎喇！」整個團隊才放下心頭大石，跟她一起完成這項「艱鉅」。面對這幾年外間的抨擊，千嬅承認經歷過一個冷靜期，千嬅說：「我今日想講，真心嘅，一個圓滿的人生總要經歷好與壞。」
上周五，楊千嬅於亞洲國際博覽館Arena舉行一連兩場演唱會，在一片爭議聲下開騷，相信是千嬅入行以來第一次，她在台上說：「大家都會很好奇，點解咁嘅時勢會仲開演唱會？其實係為咗擔心自己嘅人、栽培自己嘅前輩、對我有期望嘅人，所以我一定會返嚟開演唱會。」
本周三，千嬅接受本刊訪問，她說今次真的很艱難，「做完覺得幾神奇，又好夢幻，中間的確好多變化，開得又唔開得，百感交集，但好值得。」千嬅找了一班很了解她的班底，監製細So、音樂總監王雙駿，「由我出道到現在，大家與『楊千嬅』的連接都是一堆有共鳴的歌曲，同細So開了幾次會，分享了一些近幾年的體會，決定有別過往的紅館騷，以劇場形式表達，好耐沒有在香港開騷，希望大家看完，會明白我點解咁堅持去做。」今次Side Track歌單，其實千嬅準備了一些神秘歌曲準備encore送給歌迷，其中一首她很想唱，但最後不夠時間而割愛，「有一隻歌編好晒，很想唱《我不要你愛我》，唱唔晒，驚阻住人收工，下次要再唱返。」千嬅亦自學彈奏《再見二丁目》，可是臨場有些甩漏，「我練咗四個月，好想平反，上到台見到個琴就有壓力，搵日要拍返條片畀大家睇，我喺屋企彈到㗎，我諗我係有集中力困難症。」
堅持開騷，當中最大原因，是希望告訴擔心她的人，她一切安好，千嬅說：「唔想大家擔心，想畀大家知道我有好好照顧自己，尤其父母，成日擔心我聽到外間聲音會唔開心，第一晚完騷，老竇send個message畀我」With your courage you have in your heart, you are always unbeatable.」(憑着你心中的勇氣，你總是無敵)，睇完之後，先知道佢係有幾咁擔心，我相信如果真係鍚我嘅人，都會有同樣嘅擔心。」面對網民的抨擊，這兩、三年，很多人都想知道楊千嬅怎樣捱過去？「是有一段時間需要冷靜的，回歸了家庭，從很多視角去望，我發現要學習消化新的時代，時代不同了，我怎樣去銜接呢？無論媒體、娛樂圈、人與人之間，都要重新調整。」
決定開騷的時候，千嬅正為《聲生不息》拍攝，身邊的工作夥伴，甚至家人都投反對票，「佢哋唔知我點諗，我個樣成日都好似冇事，直到我講『我ready㗎喇！』，大家才敢go ahead，講真，我出來做得這個騷，我真係冇嘢喇，係時候move on，了解咗自己，知道應該點再行下去，我唔會再坐喺度左擔心右擔心，我現在不再是單純歌手身分，又不需要再很進取，我是媽媽、太太、又係人個女，我懂得處理問題，只是需要時間去消化。」
為打通千嬅的任督二脈，是兩位樂壇大前輩，「因為拍節目，同Lam哥(林子祥)、沙麗(葉蒨文)幾個月一齊住，有日我問Lam哥點解做這個節目？其實他可以唔使咁辛苦，他說只係鍾意唱歌囉，佢話現在好多後生都唔知我哋唱歌、唔識我哋嘅歌，想分享畀佢哋，我聽完好感動，我好幸運，在這個階段遇到這些前輩，他們好影響我，一下就打通咗，那一刻我把所有懷疑都拋開了。」沙麗對音樂的熱誠亦令千嬅大開眼界，「我同沙麗合唱《珍重》，我哋足足練咗七日，其實我只是唱半首，她要求非常高，在她面前，發現自己仲有好多東西要學，她對音樂要求沒有變過。」
千嬅還大讚兩位新一代歌手炎明熹和曾比特，「Gigi好珍惜機會，她會驚做得唔好，下次會冇得做，見到她，我想起當年心口仲有個勇字嗰個楊千嬅，梳理她壓力的同時，我好似同緊自己對話。」
上一次舉行Side Track演唱會已是十年前，當時千嬅臨開騷才發現懷孕，同上次一樣，千嬅除鞋踩上台，未問千嬅已搞笑話：「膝頭哥痛呀！我話我有咗你都驚啦！」Torres轉眼已十歲，千嬅說兒子很喜歡音樂，媽咪的歌？他識一首《河童》，「《飛女正傳》他應該識，但扮晒唔識，佢聽嘅歌我唔識㗎喇，竟然識唱韓文歌，識唱BLACKPINK㗎，我問佢點解識韓文？他話上網學識用英文拼音，現在小朋友學嘢有自己方法，今次搞騷最開心係感染到Torres，之前仲懶懶閒，現在每星期自動自覺online上堂學唱歌。」完成兩場演唱會後，千嬅便會放一個悠長假期，「唔知放幾耐，但這次不是巡唱的尾站，我當是一個限定場。」
