34歲的鄧小巧與外籍老公「白先生」去年於加拿大結婚後，在當地過着幸福人妻生活，不過，對音樂仍然有團火的小巧，一早被老公看穿，幾個月前便提議一起回港定居，讓老婆可以繼續追夢；至於在加拿大土生土長的白先生，原本做原油工作，為了小巧打算轉行做健身教練，在香港一起重新開始！
繼Gin Lee李幸倪今年簽約成為英皇藝人後，鄧小巧亦宣布加盟英皇，本月火速推出新歌《瀟灑》。大家以為小巧簽約公司後才決定回流，她解釋：「其實我搬咗返嚟，錄緊新歌，才遇上新公司，時間好短，當時同老公搬返嚟香港，我仲係以一個獨立音樂人嘅身份，諗住繼續行，睇下在現有的資源下，仲可以行到幾多、做到幾多。」09年參加第一屆《超級巨聲》入行的小巧，期間只簽過一間唱片公司，今次有什麼誘因？「是突然間有位高層出現，他說就算不合作，當見個面認識吓，之後聽了他對我的理解和想法，我又覺得work喎，他更強調完全尊重我的創作自由，只要keep住自己想做嘅嘢，一齊合作就得，呢個對於我嚟講是一個好大的引誘，因為創作自由，然後又有資源，是一個夢寐以求的合作，都算是一拍即合。」
在加拿大居住了差不多兩年，但小巧的身份未能在當地工作，她直言感覺不太實在，「我搬去加拿大的時候，因為在當地沒有一個很大的生活圈子，我又唔揸車，沒有車牌，其實感覺幾抽離，返來香港感覺好奇妙，係咪叫回流呢？on and off走咗年幾兩年，都唔知算係定居過加拿大，抑或離開過香港，唔識去畫呢條線。」
回流這個決定，是白先生覺得小巧好像失去了開心的感覺，小巧說：「他覺得我鍾意唱歌，應該繼續唱，他見過我工作嗰一面，有時見到我狀態唔太開心，並不是發生什麼唔好嘅事，係好似冇咗自己咁，我記得嗰陣我講笑問佢，咁你搬過嚟香港？咁我可以繼續唱歌囉，佢諗都唔諗話好呀！我心諗真定假呀？老公喺加拿大由出世住到而家，香港沒有油田讓他工作(石油行業)，佢又從來冇去過亞洲，點知佢話嚟香港可以轉做trainer，反正健身多年，不如有個新開始，於是喺半年內，我哋就整理好嗰邊所有嘢，我先返香港安頓，然後佢再搬過嚟，佢習唔習慣？佢嘅答覆係幾期待冇冬天嘅感覺，因為Calgary都幾凍，佢話香港好綠色，因為我哋住郊區，佢覺得香港好多樹木，又近沙灘，可以成日去游水，某程度上，佢係幾興奮嘅。」
問小巧當日求婚過程，她說：「其實求婚是在平安夜當晚，我好多謝他沒有搞大龍鳳，我成日都覺得，婚姻是一件很親密的事，他選擇在一位從小認識的老朋友屋企，一起過聖誕兼求婚，感覺是很舒服，如果在一班人面前，我會好尷尬，如果想say no點算呀？哈哈！」
21年答應「白先生」求婚，22年3月在加拿大舉行婚禮，由於疫情關係，一眾好友包括林欣彤和許廷鏗等，只能透過Zoom見證婚禮，小巧說 ：「某程度上，我是一個好怕繁文縟節的人，好怕要做好多禮儀，又要設計酒席邊個坐邊度，我結婚的時候仍然是pandemic(大流行病)，所以大家都飛唔到過嚟，不如就開咗個Zoom，邀請大家同步見證，我覺得方便快捷幾好。」回港後，小巧只搞了一個簡單的cocktail party，「只要我最親的朋友，來到見吓老公，大家飲吓酒、傾吓偈、笑吓，每個人見到面就ok，中式婚禮圍住敬酒，敬完就走，成晚可能同朋友只係見到幾秒鐘。」
提到小巧的老公，不得不提藍奕邦，事緣小巧跟白先生第一次約會，剛好藍奕邦飛到加拿大，「白先生約我食飯，我話今晚有個朋友九點幾就會到加拿大，所以食完飯就要走了，大家都知first date呢啲嘢，如果鍾意有意思咪下次再見囉，冇意思，我都有個藉口可以走人，而當時嘅藉口就係阿邦，之後白先生送我返去酒店的時候，阿邦就係樓下，佢仲話：『你個八婆，掛住去拍拖，我嚟到要我樓下等你check in。』你都知阿邦嗰啲語氣啦，但佢係開心嘅，之後見到我同老公相處，佢又話『喂！呢個嫁得喎，嫁咗去啦。』當時疫情所有人都未見過我老公，得阿邦同我當時的監製謝國維，以家長的身份幫吓眼咋。」
訪問當日，小巧手上沒有戴上婚戒，她很隨意：「今日冇戴添。」小巧現在的心態是什麼都既來之則安之，生活如是、事業如是，「唔關結婚事，可能人去到某一個歲數，所有嘢好同唔好都係自己做出來，唔好嘅咪下次做好啲囉，好嘅咪好好享受個成果。」
問她有沒有計劃生B，小巧非常堅決：「我過咗想要小朋友嘅階段了，我仲係25、26歲嘅時候，覺得有小朋友，才是一個完整人生，但人愈來愈大，覺得人生冇話一定要擁有啲乜先係完整，而家嘅生活狀態我幾喜歡。」
化妝：@Khaki_yan
髮型：@a_don_
形象：June Wan & Herman Sin
場地：Tapa Room