Twins於今個星期日（21日）展開一連十四場《TWINS SPIRIT演唱會》，騷前二人率先為樂迷送上全新廣東專輯《WE ARE TWINS》，當中歌曲《夢想與夢》亦於今日（19日）上架，新歌呼應《風箏與風》，展示Twins多年來在演藝路上，保持熱誠的初心不變。新歌遠赴台灣取景拍MV，二人好友容祖兒亦驚喜獻聲。Twins訴說這22年的旅程，就像做夢一樣，「《風箏與風》呢件事係一個開始，但係我哋而家着得好華麗、好唔一樣，回想番，好似經歷咗好多，好似發夢一樣。可以維持到咁多年，其中一個係呢個本身就係我哋嘅夢想。其實今次呢個MV有一半係一個夢境嚟嘅，我哋而家著住呢套衫係喺夢境入面嘅服裝。後尾去番現實，就係去番放風箏。」
睽違六年再次推出實體碟，阿Sa表示現在很少人會出實體碟，「因為我以前細個嘅年代係鍾意實體碟，攞住隻碟好開心，同埋又適逢演唱會，希望大家鍾意。」歌詞方面，雖然二人沒有給明確的方向予填詞人，但大家都不約而同地寫出相似的東西，「因為佢哋都見證住我哋嘅成長，佢哋係喺佢哋嘅角度去寫我哋，睇到係好感動。」阿嬌則謂專輯中的歌曲跟以前很不一樣，「我哋由出道到而家每一張碟都嘗試咗好多嘢，今次都有好多新嘅元素，亦都有回憶，因為我哋開演唱會，都想有新嘅作品帶俾大家，咁耐冇出廣東碟，希望可以有廣東歌，又可以配合番我哋嘅演唱會，俾一個新嘅感覺俾大家。」
演唱會即將開鑼，二人表示準備就緒，阿嬌坦言開始感到壓力，「有少少緊張啦，開始有少少手震，有少少瞓唔着，有少少壓力，ok嘅。」阿Sa則謂：「要準備嘅嘢都準備好㗎啦，而家係要好集中將所有嘢全部擺埋一齊。」