韓國男團SUPER JUNIOR（SJ），今晚（20日）在亞博舉行第二場尾場演唱會。由7月開始在首爾啟動的《SUPER JUNIOR WORLD TOUR – SUPER SHOW 9:ROAD》第九回演唱會，終於輪到香港站。
SJ八子崔始源、利特、藝聲、圭賢、神童、銀赫、東海及厲旭炸爆亞博，又唱又跳三粒鐘，尾場氣氛high爆，開場以《Burn The Floor》揭開序幕，大玩手燈舞，跟住《The Crown》的火燒visual，效果十足！連唱七首歌《Mystery》之後，八子先有機會同觀眾打招呼同傾偈，和昨晚頭埸一樣，先嚟「Hi Hi Hong Kong 」打招呼，最搞笑輪到東海話：「大家好，我哋今日更加靚仔 ！fans都比尋日靚仔，唔好話俾大家（昨晚觀眾）聽！」跟手俾飛吻、心心；到始源就大曬「煲冬瓜」，再加廣東話講：「你哋係我嘅心肝寶貝！」然後連環做出派心心、俾愛、摸面甫士，冧死現場觀眾！
