MIRROR下月成軍5周年，今日（26日）12子齊腳到商台宣傳全新團歌，一如以往獲大批「鏡粉」在門外守候。接受訪問時，主持人問MIRROR會否出席《叱咤》頒獎禮記者會，隊長楊樂文（Lokman）說：「以最新嘅更新，同上次更新嘅差唔多，有興趣去嘅，然後再睇下時間OK唔OK，大家期待下啦！」至於新歌《Catch A Vibe》是否今年MIRROR最後一首團歌，Lokman說：「我估係最後一首，之後籌備演唱會。」
MIRROR成軍5周年，問到他們有何感覺？副隊長江𤒹生（AK）說：「呢5年發生好多事，《全民造星》到依家過得好快，好多嘢唔係捉得好實。」姜濤則說：「希望大家繼續加油，因為呢5年雖然有好多開心事發生，亦feel到有唔開心嘅事發生，外界對我哋愈來愈多批評聲音，希望我哋每個人頂住壓力繼續前進。」盧瀚霆（Anson Lo）則說：「呢5年好好彩，得到好多人幫我哋，嚟緊5年繼續同我哋一齊行，無論影視工作及音樂，需要大家繼續留意同支持。」
另外，主持人問到明年1月演唱會補場，海報會延續去年的主題，還是全新主題？Lokman指新和舊主題都會有，但不知道會否秉承各成員排排坐的傳統。至於演唱會會否加場？Lokman說：「我哋都未知有幾多場，等公布先，場數唔係好夠嘅話，之後再幫大家爭取。」問到有甚麼願望希望達成，AK說：「大家都想加人工，環遊世界拍團綜係幾唔錯想法。」Stanley則說：「去唔同地方跟粉絲見面，呢個都係我哋積極要求嘅嘢，唔知得唔得，希望可以實行。」