違睽7個月，人氣男團Mirror推出2020年首支派台作品《IGNITED》，以迎接今個炎夏。早前12位成員：Lokman、Anson Kong、姜濤、Ian、Anson Lo、Edan、Stanley、Jeremy、Jer、Alton、Tiger及Frankie一同拍攝MV。適逢拍攝當日是Ian牛一，眾人更在現場齊為壽星仔慶生。
新歌《IGNITED》曲風有別以往《ASAP》或《Reflection》等作品，編曲走Funky路線，隊長Lokman介紹新歌道：「就好似歌名一樣，《IGNITED》俾人好熱辣辣嘅感覺，曲風同以前好唔同，感覺較Funky，因為都想有啲新花款，所以搞的新意思，俾啲唔同感覺大家。」
而經理人花姐，繼Jer的《水刑物語》後，再次為Mirror擔任MV導演，在拍攝上為組合帶來全新概念，配以360角度拍攝，不過拍攝期間卻發生小意外，Stanley說：「我哋首次採用360舞台拍攝，好有型嘅，而我又好彩係第一個拍，但好不幸我好有型望住個鏡頭一眼，個Cam嘅轉台就壞咗，之後攝影師要人手Keep住轉個Cam先可以繼續拍攝落去。」
Edan坦言同時表演Funky版本和Remix版，是一次體能上的大挑戰，「Funky版趣味少少，對於姜濤、Anson Lo佢哋型開嘅就困難少少，哈！Remix版感覺K-pop少少，我哋亦有拍一個Dance Version，要一鏡過。上次《Reflection》跳咗廿幾卅次，真係崩潰咁滯，希望今次可以快手啲。」眾隊員亦不負所望，最終連拍6 take，花姐便已收貨。
而拍攝MV當日，剛好是Ian的生日，工作人員早已偷偷為他準備生日蛋糕，在拍攝中途更與Mirror各人突襲送上驚喜，Ian發現後展露天然呆表情，十分趣怪。被問到生日願望時，Ian誠心祝願道：「最緊要世界和平，喺疫情之下，亦希望人人有工開，不過就早啲收工啦！」
Mirror早前已落實舉行個唱，惟受疫情影響，演唱會需要二度延期，Alton解釋道：「演唱會因為受住種種因素要再延期，但我哋Mirror希望可以把握延期嘅機會，製作更多好嘅作品，可以喺嚟緊演唱會做出更有Mirror特色嘅演出俾大家睇，希望大家拭目以待。」