張天賦（MC）昨晚（28日）重臨出道前經常Busking的尖沙嘴文化中心，為歌迷舉行一次免費的音樂會《This is MC – Live at Victoria Harbour》，MC坦言既開心又感動，更跟大家分享Busking都有階級觀念，他說︰「真係冇諗過咁多人，好開心，好多謝大家來捧場！你哋知唔知？Busking都有階級觀念，唔同位置有唔同level，當初我只係走廊附近唱，之後多人聽，就可以升呢去電話亭，之後再升呢就係碼頭再落少少個位，然後最後就係呢度啦！」觀眾報以歡呼及掌聲，「今朝我起身先發覺，自己個狀態唔知係咪冷親，喉嚨少少腫聲又萌，不過唔緊要，我都係會盡力去唱，Busking係咁㗎啦。」
MC選唱了兩首英文歌，分別為《Nothing on you》及《Talking to the moon》，唱畢後他語帶感動說，「都算還咗自己一個心願啦。其實獎唔獎都真係唔緊要，最緊要係大家來睇我唱歌，鍾意我唱歌。」音樂會完結前，工作人員抬出歌迷送的大生日蛋糕，讓12月生日MC非常意外及驚喜，「嘩！好靚呀，我都差啲唔記得咗啦。」繼而他拿出電話，拍下全場歌迷唱生日歌給他的畫面做紀念。再encore《Good time 》及《老派約會之必要》以答謝大家的愛。演出後，MC接受訪問時表示能站回初心出發地唱歌給大家聽，是自己一個願望。問到甚麼時侯再搞演唱會？MC說︰「公司再安排啦。地點不是重點，係海傍唱我都好開心，今次俾到信心公司，希望不久將來可以再搞！到時叫公司喺對面海大廈，打啲歌詞出嚟啦，當提詞器，咁我就唔會再忘記歌詞。我係busking馬拉松之鬼嚟㗎，以前一出來唱就唱5、6個鐘，今日好小兒科唔夠喉啦，台上面都曾經感觸同感動，唱到某啲歌，回想返當初busking辛酸史，車費都搵唔夠就俾人趕走呀咁，行到今日咁多人返來睇我唱歌，真係有個體會。我好希望香港可以好似台灣咁，有一些地方係有牌，可以比busking的朋友，安心演出，咁對busking街頭文化先有幫助。」
談到年尾樂壇頒獎禮，MC說︰「我今晚已經係一個大獎啦！獎項我永遠都係平常心啦，觀眾肯聽我唱歌，識得同我一齊唱先係最好最大獎，我知自己輸咗俾光B（尹光），我冇介意，話晒佢都係前輩，輸俾佢都值得！男歌手三甲有冇信心？我對觀眾識我，識唱我啲歌有信心囉。」談到今年生日如何度過？MC謂約了媽媽食飯，又約了朋友一齊玩，至於生日願望，「今年再許快高長大冇乜用啦，反而我好想瘦啲，今次唔係吹水啦，因為最近有參予電影拍攝工作，當中好多打鬥場面，發覺自己郁得最勁係肚腩，咁都想自己以後線條靚啲，有一次拍打戲重拉傷左大髀筋，好痛呀真係。今次同宇宙最強丹爺（甄子丹）合作，所以好多好勁動作戲，丹爺監製，佢好多動作有教我哋調整，我身手幾勁㗎，大家部戲出一定要去睇，都幾有型，所以希望再瘦啲，整個人視覺上、聽覺上都再好啲。」