無綫跟內地合作的選秀節目《亞洲超聲團》落幕，九位勝出的九位練習生，奧利、李權哲、冼靖峰、江信熹、梁詩煜、白子奕、文佐匡、黃奕斌及陳梁，在召集人曾志偉宣布下，正式成團，團名叫LOONG 9，此名一出，在網上發酵，唔少網民都覺得呢個名奇怪又唔好聽，除咗諗起《賭俠》入面陳法蓉名字「龍九」，又認為「LOONG」與「燶」同音唔好意頭；加上由於曾志偉當時係以英文宣布團名，令網民覺得讀音「隆奶」，連港產AV繪麗奈也出Po「話説我一出道嗰陣，唔少人叫我隆奶，估唔到而家有人拎咗來做組合名。」
Loong9出道幾日，已經成為網上熱話，甚至有商品抽水，來一個「靚抽」，好似豐澤買狗帶叫「LOONG狗帶」，仲寫上「狗狗一有街去就會放飛自我，四圍跑跑跳跳，每次睇到佢個開心樣就覺得好治癒。唔想狗狗太多束縛，你需要最強Loong狗帶……」還有HKTVmall的街市即日餸網頁，寫上街市超鮮團為「LOONG HA」，配以九隻龍蝦做圖；而Donki就「唔怕LOONG＿曬」賣平底鑊，真係好有創意，笑鬼死！
不過你有你笑，LOONG 9在各位積極討論兼二次創作下，短短幾日，團名就入晒腦，而九位成員也各自以「龍」改了焯號，分別是「馬卡龍」奧利、「霸王龍」李權哲、「龍子」冼靖峰、「東江龍」江信熹、「梁龍」梁詩煜、「小白龍」白子奕、「迅猛龍」文佐匡、「奕龍」黃奕斌及「小金龍」陳梁。