MIRROR於昨日（5日）推出團歌《Rocketstars》外，隊中四位成員：楊樂文（Lokman）、王智德（Alton）、邱傲然（Tiger）及陳瑞輝（Frankie）亦趁即將開演唱會，同日推出他們的個人單曲。Lokman的新歌《如果電話亭》玩味較濃，他說：「新歌就好似多啦A夢嘅法寶，同時亦貫徹歌曲主題，想大家做事唔使咁認真，自己覺得點就點，想諗啲乜就諗啲乜，想講啲乜就講啲乜，想玩啲乜就玩啲乜，如果係咁就發達啦！」他亦有藉着歌曲審視自己說：「自己係一個認真同太有條理嘅人，有陣時咁認真太有條理，有啲moment會好辛苦，呢首歌都係叫自己，試下亂諗嘢唔好咁有條理，放鬆下！」
至於Alton則以他擅長的Rap詞，製作新歌《非物質文化遺產》，Alton說：「嚴格嚟講係自己第一首Solo歌，今次帶啲新嘢俾大家，做呢首歌嘅時候諗返起一個Talk Show嘅環節，都係講自己嘅故事，今次變咗做一首歌，希望大家可以聽下我嘅故事。我嘅故仔其實對於大家都會有共鳴，因為香港打工仔面對一啲問題同壓力，最後出口都係自己，所以好希望大家都可以搵到呢份資產。」
Tiger鍾情美式搖滾，他的首支單曲《Alright》亦朝住這個方向製作，他說：「《Alright》係一個好有意思嘅Project，搵咗天衡（周天衡）一齊做呢首歌，由開始寫、錄製都有參與，結他有部份我自己彈，然後詞就交俾Oscar。呢首歌講嘅係入行呢幾年嘅心路歷程，一啲人一啲事，有感覺嘅人睇咗就有感覺。」至於Frankie的新歌叫《皮思苦》，是一首抒情中板作品，他希望透過歌曲，讓皮寶寶（粉絲暱稱）及廣大樂迷了解他的想法，他說：「出道5年，做過大大小小節目，拍過廣告、劇集，做過好多嘢，而觀眾好敏感，會好記得我哋做過啲乜嘢講過乜嘢，有啲可能係節目效果，純粹小誤解，但累積上嚟可能變成大誤解，但唔緊要，做得自己自然舒服，大家又睇得舒服，唔使理咁多人設嘅嘢。」
四子齊齊於演唱會前夕出新歌，當然會在MIRROR演唱會中首度獻唱，Alton說：「我嗰Part係Hip Hop啲街頭味重啲，喺演唱會裏面，會同其他都有街頭元素味道嘅朋友仔做一個大表演俾大家睇。」Lokman聽罷Alton介紹，也搞笑說：「我嗰首係開心啲Upbeat啲為主，有啲funk、電子，亦都係喺演唱會裏面同一啲街頭味重啲嘅朋友有一Part表演，令人好期待㗎！」至於Tiger就表示：「第一次喺演唱會演出，所以好緊張。彈結他方面係有機會可以喺呢個Show度表演，實情操作係點呢？就未知住！」Frankie亦和應道：「我同Tiger都有啲新嘗試，係我一直以嚟好想做嘅，但唔知Tiger想唔想做，不過就一齊做咗佢啦！」Tiger即道：「應該係變魔術。」