Advertisement

Cosplay系歌手 神還原Avantgardey爆紅 Sica由女僕cafe唱到麥花臣│何洛瑤專訪

亞洲
2024.03.08
撰文:劉家倫攝影:鍾漢平

參加《全民造星IV》入行的何洛瑤(Sica),自小鍾情日本動漫,中學已開始玩Cosplay,最近擔正主持ViuTV節目《回憶守護隊》,到日本各地偵察,尋找各地不同年代的遺物,發掘日本人如何守護回憶。

除了主持外,Sica亦出歌正式加入樂壇,今年以新人姿態打入《叱咤》「我最喜愛的女歌手」7強,這位被網民稱為Cosplay系歌手,到底有甚麼來頭呢?

whatsapp-image-2024-03-04-at-15-44-47-1

Sica將會聯同P1X3L三子葉振弘(Marco)、歐鎮灝(George)和吳啟洋(Phoebus),以及葛綽瑤(Yoyo)、許寶恆(Alice)、楊安妮(Win Win)和鍾卓穎(Ash)組成的限定團體「P1X3L 5G」下月於麥花臣開騷。

五男三女開騷,Sica笑說︰「直到呢一刻仲未諗到個騷名,八個人,P1X3L三個,加埋我哋五個女仔,我會形容為一個才藝表演,因為乜都有,好多元化;而旺角麥花臣對我來說,其實幾有意義,我以前就喺黑布街一間女僕cafe表演,cafe入面有個台仔,我會唱歌表演,例如我生日、或者特別日子都會定一個主題,例如懷舊金曲之夜、或者Cosplay event,就連我執業(離職)表演都搞咗場,我記得我當晚唱咗首《係咁先啦》。」

ViuTV《回憶守護隊》
ViuTV《回憶守護隊》

日本Cosplay玩得很盡,Sica覺得香港人對Cosplay也愈來愈接受,「香港和日本的Cosplay文化,已經唔係差太遠,愈來愈多香港人接受到。我記得我在中學時候Cosplay係會俾人笑,雖然身邊同學都知我鍾意睇動漫,但行過真係會有人恥笑我,最近扮Avantgardey個cover,我唔會話係正式Cosplay,其實細心留意,無論髮型服飾都未去到神還原,成件事其實好即興,純粹覺得隻舞幾正喎,佢哋又跳廣東歌喎,拍咗兩三個take就post,但迴響比我想像中大,我有一種感慨,啊,原來依家已經步入了短片時代,原來我拍一條短片,已經會有咁嘅關注度,我諗我哋都要反思一吓。」

神還原Avantgardey的舞步及表情,除了引起網民熱烈討論外,連Seira@Avantgardey都在IG分享兼大讚Sica。今年只得23歲的Sica,身上有很多反差元素,喜歡懷舊衣著,偶像竟然是梅艷芳,她解釋︰「其實是一個榜樣多於偶像,好欣賞她是一位堅毅不屈的女仔,在舞台上有自己個人特色,我覺得她知道自己想點,亦都好勇於表達自己,好關注社會,我特別喜歡她的《壞女孩》、《淑女》,好有Woman Power。」

whatsapp-image-2024-03-04-at-15-44-48-2

作為樂壇新人,Sica推出的歌曲《天氣之女》深受年青樂迷喜愛,更打入《叱咤》「我最喜愛的女歌手」7強,Sica說︰「當時知道第一個反應是嚇親,覺得自己未夠班,仲有好多不足,嗰一刻係有心虛,但後來自己慢慢消化,跟朋友傾吓傾吓就諗通了,如果覺得心虛,咁就再努力一點吧,做好啲,令到自己對得住自己,同埋要接受喜愛自己的人。」

240735439_2875260919395977_8731178593589547420_n

參加《全民造星IV》之後,Sica簽約成為MakerVille合約女藝員,隨即獲安排主持節目《MM730-男女自然觀察學會》,她直言從未想過會出歌做歌手,「其實當初簽公司,我都沒有期望有得出歌,因為傾約的時候,我好記得有人同我講咗一句話,『你入嚟之後,可能冇得出歌冇得跳舞冇得上台㗎喎!』所以我一直個心理建設,都係拍吓節目,接吓一些outside job,咁樣我都鍾意嘅,但同時我的興趣是音樂和跳舞,兩件事可以分開,所以與其話裝備自己,可能純粹係因為我好鍾意音樂,所以我咪繼續寫歌、學唱歌囉,希望他朝有一日,真係有機會出歌的時候,令成件事變得順其自然,又冇話係苦等咗兩年乜乜乜,我反而覺得自己好幸運,簽咗公司兩年就可以出歌,其實係感恩,終於做到呢件事!」

272790212_115686654337883_5881901153839830012_n

幸好沒有放棄音樂,《天氣之女》之後,Sica推出的《再見有時》唱出離別心聲,成功打動不少樂迷,「我知自己仲有好多不足,無論我說話咬字、台風各方面,幸好這兩年沒有放棄過接觸音樂,去睇好多show,《再見有時》呢首歌,so far係好多朋友,路過見到我嘅人,都會因為呢首歌同我打招呼。呢首歌的確令到更加多人知道,原來Sica是一位歌手,未必會話係轉捩點,但起碼在心靈上俾到一個好大安慰自己。其實由細到大,我有兩個淚點,好容易觸動到我情緒,第一個係好奇怪,唔知點解見到人失戀暴飲暴食,我就會好想喊,覺得自暴自棄好慘;而第二個就係關於離別,所有離別都會觸動到我,巧合地上年充滿各式各樣離別啦,特別係自己的好朋友離開香港。」

whatsapp-image-2024-03-04-at-15-44-47

 

Sica續說︰「就算拍完《回憶守護隊》,搭飛機望住日本,要同日本講拜拜,我都好感觸,之後就即刻諗到寫《再見有時》這首歌,想同自己講,其實唔使咁sad,可能會再見㗎嘛!」主持ViuTV的《回憶守護隊》,令Sica有機會到日本各地,尋找不同年代的回憶,例如到日本傳統的公眾浴池「錢湯」,原來除供大眾洗澡,另一重大功能,就是讓左鄰右里聯繫感情。

whatsapp-image-2024-03-04-at-15-44-48-4

問Sica,香港有甚麼需要守護?她笑說︰「粗口!我唔想佢消失,不過我諗都冇辦法消失,外國人都應該好熟悉香港的粗口。我網上見到有一個韓國藝人去到台灣,大家第一時間,都係教佢講當地粗口,所以就算香港有一日唔准講粗口,我諗香港的粗口已經根深蒂固。」

 

場地︰@camplife_hk

木村光希 宋慧喬 車銀優
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹