二○年十月，余香凝Jennifer突然宣布與圈外男友陸政渡Tim結婚，去年五月誕下囡囡Clare，有指Jennifer嫁入豪門做少奶奶，更進駐半億豪宅。
不過，產後極速收身的Jennifer卻宣布全面復出，下月將有三套電影上映，原來拍攝新戲《心裏美》時突然發現懷孕，煞科時劇組才知道，嚇得監製吳雨打電話鬧她，不過這套戲囡囡有份「演出」，Jennifer說特別有意義。
雖然Jennifer在懷孕期間足足重了四十多磅，積極收身的她，除了回復fit爆身形外，更有意外收穫，她說：「開頭有俾心機減磅，飲食清淡加上做運動，但現在已經不用再刻意減了，因為湊女反而keep到，更發現生完BB長高了2cm，本來175cm，現在177cm，好神奇呀！」囡囡剛滿一歲，Jennifer十分留意囡囡的性格，「初時好擔心她性格太怕羞，好似對什麼都沒有太大反應，現在慢慢變得主動了，出街會跟人say hello，希望她長大後好似我一樣唔怕羞，唔怕羞的人會比較善於表達自己，不會收埋情緒，好驚小朋友會收埋情緒，不知道她開心不開心？有好多新聞都見到學童情緒問題，選擇了不好的路，甚至輕生，其實可能是家長和學校跟他們不夠溝通，如果由小到大培養囡囡乜都講就最好。」
有指她的老公家境殊不簡單，家族在香港經營製衣生意，婚後更搬入市值半億位於荃灣的豪宅，以為Jennifer嫁入豪門做少奶奶？她說：「這些都是舊思想吧！大家都以為女演員結婚後就不工作，我都唔係好老啫，我都仲有好多夢想，我又好鍾意演戲，每次收到劇本、接觸的人和事，都可以講返俾個囡囡聽，她長大後可以看到我的作品，讀書時可以睇吓《心裏美》和《非同凡響》。」
Jennifer下月暑期檔將有三套電影上映，「八月亦會開一套我很期待的電影，其實都是全面復出了，最辛苦是唔夠瞓，真的體驗到做母親的辛苦，現在就算開通宵班，朝早一樣都要六時起身陪她上playgroup，直到她小睡才可以瞓一陣，有次開完工天光回家，在房聽到她和工人姐姐在廳玩，我就會不忍心，會起牀，不知道為什麼有這個精神撐起自己？但我享受的。」復出拍戲加上照顧囡囡，Jennifer要好好分配時間，「唯有減掉自己的睡眠時間，我不會減掉與囡囡的相處時間，我唔忍心㗎！一見到個囡就想跟她玩，等她睡覺才做自己嘢，幸好她算早瞓，九時多我就可以有時間睇劇本。」會否再追多個？Jennifer說：「追就不會馬上追，不想三年抱兩咁密，但未來都想生多個，我有一個阿妹，長大後都可以搵她傾偈，有個伴係好啲。」Jennifer最近跟毛舜筠拍戲，她亦趁機向毛姐偷師，「好想學毛姐做一個煮嘢好叻的媽媽，煮完屋企人又喜歡食，成件事好減壓，最近經常上網找食譜，小朋友吃的蛋糕仔，每次囡囡都好捧場，見到她吃東西，我就好開心。」