AI尹光大熱，由《一人之境》、《Dear My Friend》到《老派約會之必要》、《可惜我是水瓶座》都有份，光B話：「個個攞我把聲，仲有一隻叫《你老豆索K》模仿到九成咁犀利！」尹光話，唔講以為真係自己唱！
當年的廟街歌王變成今天的AI歌王，尹光說人生的第一個高峰，是91年張耀榮找他在紅館開騷，一年內三度踏上紅館舞台破紀錄，而今次的AI潮，可算是他另一個高峰。與時並進，79歲的尹光，早在今年4月已開IG吸粉，再來一波AI潮，光B話：「再唔開就俾人話你out喇！」光B永不言out呀！
這波AI尹光熱潮，唔講得笑，連酒店場地的公關，一聽見被訪者是尹光，也立即說：「正喎，光B！等我都抽時間去打聲招呼！」真的，以往叫尹光做光哥，現在都要改口叫光B了。光B笑說：「佢哋話我啲fans依家叫做『光酥餅』喎，笑死我！」
跟住個潮流走，光B說就算未有AI尹光出現之前，他已經聽過林家謙、姜濤的歌，「唱得非常之好，佢哋係年青一代歌手，佢哋嘅歌同我哋嘅金曲唔同唱法、唔同聽法，唱得非常之好，我好欣賞。」姜濤聽完AI尹光，即說要找尹光做演唱會嘉賓，下周正是姜濤solo開騷。問光B，到底姜B找數未？「佢就未搵過我，聽講係佢訪問時講過啫！」忽然大熱，光B話雖然開心，但凡事有兩面，「提升咗我個人氣，我當然開心，但有一樣唔好，多咗好多閒言閒語，有人鍾意、有人唔鍾意，有人讚有人彈啦，一百個就算有九十個讚，都有十個彈你！我冇所謂，因為關公都有對頭人、曹操都有知心友！」
不過今次肯定讚多過彈，更重要吸了一班年輕人粉絲，光B坦言：「好多評語我都睇過，好多都話從來未聽過尹光唱歌，但呢次AI聽落唱得唔錯喎！」有網民仲話AI尹光唱得好過原唱，一向識做的光B就話：「千祈唔好講呢句，我覺得個原唱唱得非常之好，我冇可能學到佢咁叻，因為我個style唔同，如果你叫佢哋唱返我嘅歌，佢亦都未必唱得好似我咁！」
同軒公唱《你阿媽大減價》
尹光愈老愈精靈，早前張敬軒在演唱會上，知道尹光來捧場，即席在台上哼出名曲《荷里活》，還說要與尹光組CP。光B說由張敬軒初來港出道已經認識他，「我同佢熟，其他啲歌手我唔熟，佢演唱會我送花籃去，我演唱會佢又送返個花籃俾我，佢又話請我食飯。因為好耐以前我已經識佢， 佢初出道嘅時候，我覺得呢個後生仔，當時我唔識佢個名，我話呢個後生仔咁好聲，我見到佢就同佢講，細路細路埋嚟，我話你真係好聲，你將來一定成功，結果俾我估中！依家講起十幾廿年前嘅事啦，我睇好佢，佢真係好多fans！」光B說，他已經想好，如果有機會與軒公組CP合唱，他說：「梗係唱《你阿媽大減價》啦，佢好熟我啲歌！」另一位視尹光為偶像的，是ERROR的保錡，早前在Viu節目相遇，兩人rap起《少理阿爸》，當時保錡說終於圓夢了，光B說：「我夠鍾意佢啦，我之前未識佢，只係喺電視睇過，我覺得呢個年輕仔，好生鬼好活潑！」
其實在6月份興起的AI尹光潮之前，光B早於4月時已經開了IG，「與時並進㗎嘛！你唔開，人哋就話你out㗎喇！正式追蹤我嘅朋友，唔係好多啫，五、六十個，粉絲依家就過萬。我都會睇留言，但覆就唔會點覆，如果係我啲朋友我先覆，人玩我玩跟上潮流啫！」5月開完演唱會，7月中再開粵劇騷，流行曲與粵曲都難不到尹光。新歌《掂呀》就聯同新進rapper阿弗featuring，光B說這首歌是用來送給年輕人，「呢個係正能量，因為近來社會好多年青一代，好多都唔求上進，呢隻歌就勸佢哋，唔好hea下hea下，唔好成日做宅男啦，出嚟社會見多啲世面，向上掙扎爬高啲啦！」光B還即場rap起歌詞來，「跌到企返起身 病嘅好返未 識得返屋企 準備好出返嚟 由頭到尾 我哋都係做返我自己 有時悲有時喜 有時刀仔拮大髀」。
光B說，自己1970年從越南偷渡來港到今天，至今53年，「已經唱咗53年，我睇見好多代人，轉行嘅轉行，一次又一次轉過幾趟人。」尹光到今天依然可以繼續唱下去，他很感恩。本身學唱粵劇，來港後有機會二次創作改歌詞，尹光成為當時最貼地的本土歌手，「依家一路睇香港，未有一個好似我咁多種類，要rap又要唱粤語流行曲，又可以唱大戲，又可以唱粵曲，又可以填詞，越南歌、 英文歌、日本歌唔多唔少都叫識唱。」
當年廟街歌王的誕生，因為一首唱出小巴司機之苦的《十四座》，「跑出第一首歌《十四座》，亦都係我第一隻唱片第一首歌，之後開始好多唱片公司搵我，好多詞自己填，例如《雪姑七友》、《荷里活》、《數毛毛》、《師姑夢》……我將個譜填啲第二啲詞落去，當作二次創作。我1970年偷渡嚟香港，直到74年之間，我唔係唱粵語流行曲，我係唱國語歌，直到74年有人搵我做唱片就跑出《十四座》第一隻hit歌。當時廟街好賣得，街頭到街尾檔檔都播我嘅歌，所以啲人就叫我做廟街歌王，我實在冇喺廟街唱過歌！」
以修哥為目標唱到老
尹光的確是二次創作先鋒，他說：「唔計粵曲，第一首就係《荷里活》，本身呢隻歌得兩句，同埋佢唱嗰啲係不文踩界，我改咗用『三個肥婆學踢波』，但好多人曲解咗，我講踢波，你諗第二樣嘢你嘅事啦！」被封鹹濕歌王，尹光心有戚戚焉，「梗係唔係鹹濕啦，係你鹹濕，你自己曲解咗，我都冇踩到界，係你諗歪啫，不過講時講，有好多聽眾係鍾意踩下界。」光B立即舉例，「比如《一個黐膠線的少年》，你聽到歌名有多少踩界，但入面歌詞冇嘢㗎，佢好正經，又好似《Holland Bank Cheque》，正式講荷蘭點讀㗎，咪Holland囉，支票點讀，Cheque囉，等如啲人話澳門風扇，Macau Fan，一樣咋嘛！攞嚟搞笑幾好，大家開心啦！」說到最愛，光B的選擇是《荷里活》，「我都係揀《荷里活》、第二隻我揀《你阿媽大減價》！《少理阿爸》係另外一間唱片公司請我去唱，當時我唔知道，呢隻歌會全世界都識，好巴閉呢隻歌，當時唱嗰陣唔知，唱完收錢就算，點知所有Disco都播呢隻歌，所有年青人都要唱過，先肯返屋企瞓覺。」
活到老唱到老，光B說現在的人生，勝在有得揀：「我敬業樂業，我為興趣而唱，所以依家我揀歌唱。以前冇得揀，以前為生活而唱，人哋俾錢你就唱，所以好多踩界歌，點解要唱？你要食飯嘛，你唔做就冇錢囉，依家有選擇！」依家搵夠？「唔係夠與唔夠，一個人嘅生活唔需要好多錢，知足常樂，我夠食就算，我又唔會肚餓。」
光B以修哥胡楓為目標，「修哥好勁，九十歲都開演唱會，我都有捧佢場，佢好犀利，一出嚟唱十幾首歌喎！只要我keep到我把聲，我冇諗過退休，依家仲有好多人請緊我，甚至乎紅館都搵緊我，我睇下條件啱唔啱啦，啱咪唱囉！」會唔會尹光真人版唱返次《Dear My Friend》？光B好識撈，「睇下咩演唱會啦，小型就唔唱，要大型先唱！我自己個人演唱會先唱，如果我唱，我盡量記熟歌詞，要記得晒先！」掂呀！
髮型：哈佛增髮技術中心
場地提供：迷你中環
