羅家英接受車淑梅主持的香港電台第一台《舊日的足跡》訪問，首次透露曾有兩次向汪明荃求婚的衝動，結婚13年一直有給家用。
家英哥與阿姐結婚多年，雖然她生財有道，不過自己結婚多年一直也有給家用，他說：「我冇要求過佢養我、帶挈我、俾錢我。你有你嘅，我有我嘅，我哋分得好開。婚後一齊住我有俾家用，佢好緊張㗎，佢話『你要養老婆，你唔使養老婆咩？』佢有錢都要攞你㗎！」外間一直認為家英哥娶到阿姐會好開心，生活富足，但他認為：「呢啲喺世俗嘅眼光，我唔覺得佢高高在上，我感覺大家好平等。佢有錢、有名氣，我唔介意，亦都唔稀罕，所以冇呢種心態。」有傳家英哥向阿姐求婚19次，他澄清不是事實，更指對方家庭觀念較重，自己反而有結婚恐懼症，並憶述2002年阿姐患癌，他沒有提出結婚，直至2004年他患肝癌，阿姐才開口提結婚，他說：「只係輕輕講，喂！我哋幾時結婚？我就話，結咩婚？唔好結住，睇定啲先，都未了解清楚‥‥‥」
家英哥回想曾經有過兩次結婚衝動，第一次是汪阿姐擔任人大要上深圳開會，他想到對方若從政，必先要處理好家事，所以需要給她一個名份。後來她做了政協便沒有再刻意提及。第二次是1996年，他憑電影《我愛廚房》獲提名香港電影金像獎「最佳男配角」，當時自覺勝算高，於是計劃得獎之際，在台上即場求婚，令金像獎有一段佳話，他說：「我請阿姐陪我去睇金像獎，佢都覺得我機會高，點知輸咗。我有啲唔忿氣，因為我覺得我由頭到尾扮女人，好有難度。不過呢件事之後，我亦都冇出聲（求婚），金像獎就冇咗段佳話喇！就係呢兩次，我一直冇話俾佢聽我有咁嘅打算‥‥‥幾時講？從來都冇講，就今次講啦。」
後來，家英哥的媽媽離世要出訃聞，他要決定要加上汪阿姐的名字。當時兩人已有結婚的感覺，便到拉斯維加斯註冊結婚。家英哥大讚阿姐是勤力的太太，無論家中雜務或粗重功夫都會做。「佢鍾意做嘢，身體好過我，早上九點幾就起身精力無窮。我無想過退休，可能80歲啦。我有想過俾一啲遺產佢，俾一啲細佬。我對人生已睇化，經歷咗幾次大手術已冇乜嘢恐懼。好感恩個天對我不薄，我咁嘅學歷、性格，都可以做到咁已經好滿足。多謝個天俾我一個咁好嘅太太。黃昏之時，都俾我美麗嘅華彩！我哋相處之道就係，我有病得半條人命，佢有病得半條人命，兩條人命夾埋一條人命，就係你中有我，我中有你。」
