Mirror成員盧瀚霆（Anson Lo）昨天（8日）推出全新跳唱歌曲《King Kong》，並首次擔當MV導演，實行一邊跳唱，一邊兼顧幕後工作，相當賣力。Anson Lo新歌《King Kong》以Virtual Background（虛擬背景）拍攝現實故事情節，MV中可見呈現了超逼真沙漠場景，首次執導MV的Anson Lo坦言是一次難以忘懷的驚慌體驗。
《King Kong》的MV靈感來自《移動迷宮》系列電影，Anson Lo希望能向電影致敬，所以MV的開場參考了電影來拍攝，他說：「喺升降機上咗嚟之後，就去到一個乾旱嘅沙漠，大家為咗爭一枝水而展露咗唔同人性嘅決定，作出乜嘢選擇，其實成個故事配合返歌詞內容，比喻人為求要得到想擁有嘅嘢而競爭、比賽，但其實好多時同自己比較或者贏自己之餘，好大機會可以一齊贏，大家一齊擁有一個好好嘅成果，可以分享。」今次Anson Lo首次擔任導演，他形容是一個很驚慌的體驗，他說道：「冇諗過自己要參與嘅部分有咁多。以往自己預期做導演，可能只係諗MV橋段，大家著乜嘢衫，好片面嘅設計概念，但今次執導《King Kong》之後，就發現好多嘢都要顧及，除咗要顧及故事情節，仲要顧及幕後製作，例如流程或遇到困難時，要調度拍攝次序，甚至演員演繹方法、情緒，導演都有責任去講，去主導呢件事。今次係一個驚慌嘅經歷，發現自己喺幕後管理方面好多嘢都唔識，要人哋教我點去做稱職導演。」
Anson Lo表示，這為他帶來無比的壓力，並說：「如果話自己係呢個MV導演嘅時候，就好似MV 100%好與壞都完全自己造成，所以由Day 1開始都好想確保MV質素係好，或者表達故事同《King Kong》本身首歌詞係同步，呢個係最大壓力來源。」《King Kong》MV中Anson Lo不再是以往的青靚白淨造型，露出粗壯的手臂外，他笑言：「今次MV造型係自己史上最污糟邋遢、最不修邊幅，對我Standard嚟講係好大膽挑戰，因為我通常著長袖，得兩件Layer算少，而且一定長袖、西裝居多，希望今次MV會令大家覺得同以往嘅Anson Lo嘅跳唱造型有啲唔同。」
此外，Anson Lo更提及MV中有拳拳到肉的武打場面，所做的動作是以往從未嘗試過，他說：「呢個MV裏面有啲動作武打場口，今次嘅動作亦係以往拍戲時未試過，對上一次武打場口係上年拍攝《假冒女團》，當時學咗好多同功夫、踢腿有關嘅嘢，今次《King Kong》嘅打鬥就比較貼地少少，冇咁專業踢腿嘅招式，但今次用嘅招數係我未試過，例如趴地被人拉去後面，係喺電影常見嘅情節，但今次自己就可以試吓。」
