關心妍Jade20 周年演唱會勾起不少歌迷唱 K 回憶、失戀回憶，仲有好多溫馨畫面，頭場有囡囡楊榮心做嘉賓同媽咪合唱兼連打側手翻，仲請到同年新人蕭正楠合唱《特別鳴謝》；第二晚蕭正楠繼續現身，今晚佢話：「我哋同年嘅新人唔係好多繼續唱，你啦，仲有Juno，唔知佢會唔會開20周年呢？會唔會請我做嘉賓呢？」由蕭正楠口中講Juno，嚇到Jade口窒窒話：「我幫唔到你問佢喎。」笑爆全場。
今晚仲有一位神秘嘉賓，就係Sammi鄭秀文，兩人合唱《上帝早已預備》，全場歌迷起哄尖叫，Jade大叫：「好夢幻呀！喺呢個台請到Sammi做嘉賓，大家係咪好驚喜？我成長都聽你好多歌。」
Sammi說：「千祈唔好話聽我啲歌大，其實我好易搵㗎，好friendly 㗎！」Sammi落台時不忘宣傳吓，「我開演唱會你哋都要嚟睇呀！」
